ዓመታዊ ክብረ በዓል ኪዳነምሕረት ኣብ ከተማ ቦልነስ ብድምቀት ተኸቢሩ:

ኣብ ሃገረ ስዊዲን፡ ቦልነስ ኣብ እትበሃል ከተማ ዓመታዊ ክብረ በዓል ኪዳነምሕረት ትማሊ ቀዳም 21 ለካቲት 2015፡ ካብ ዝተፈላለያ ከተማታት ሽወደን ብዝመጹ ልዕሊ 20 ዝኾኑ ሊቃውንት መማህራን፡ ካህናትን ዲያቆናትን  ከምኡ’ውን ልዕሊ 300 ዝኾኑ ምእመናንን ኣብ ዝተረኽቡሉ፡ ብዓብዪ መንፈሳዊ ድምቀት ተጸምቢሉ፥ እቲ ጽምብል ካብ 20 ለካቲት ሰዓት 16፣00 ድ,ቀ ብምቅባል አጋይሽ ጀሚሩ ካብ ሰዓት 20፣00 ድ,ቀ መደብ ብጸሎት ምስ ተጀመረ ብዝተፈላለየ መደባት ማለት ትምህርት፡ ሓፈሻዊ ፍልጠት ማዕሪጉ አምስዩ። ቀጺሉ መዝሙር ብመዘምራን ቤተክርስቲያን ኪዳነምሕረት ቦልነስ: ብመዘምራን ቅድስት ሥላሴ:  ያቭለ ብመዘምራን ቤተክርስቲያን ቅድስት ማርያም ሳንድቪከን ፥ብመዘምራን ቅዱስ ሚካኤል ሱንድስቫል፣ ከምኡ ውን ካብ ዚተፈላለዩ ማሕበራት ብዚመጹ መዘምራን ቀሪቡ።

ካብ ከባቢ ሰዓት 4:00 ድማ ማህሌት ተጀሚሩ ብሊቃውትን ካህናትን ዲያቆናትን ማዕሪጉ ሓዲሩ። ከባቢ ሰዓት 7:30፣ ቅዳሴ ተጀሚሩ ቅዳሴ ድሕሪ ምዝዛሙ ብሊቃውንቲ እናተሰነየ ዑደትን ጸሎተ ምህልላ ስለ ህዝብን ሃገርን  ተከየዱ፣  ኣብ መወዳእታ ቃል ምስጋናን ወፈያን ምስ ተገብረ ዕዱማት ናብቲ ብኣማንያን ቦልነስን ከባቢኣን ዝተዳለወሎም ናይ ምሳሕ እንግዶት ኣምሪሖም። ናይ ሎሚ ዓመት ክብረ በዓል ብኹሉ መዳያቱ ፍሉይን ብሉጽን እዩ ኔሩ። ከም ውጽኢቱ ድማ ኣብ ገጽ ኩሎም ዕዱማት ይኹኑ ነበርቲ እቲ ከባቢ ፍሉይ ናይ ፍስሃ መንፈስ ይንበብ ኔሩ።

ነዚ ዝገበረ ህያው አምላክና ዚከበረን ዚተመስገን ይኩነልና።

ዓመታዊ ክብሪ በዓል ኣቡነ ኣረጋዊ ኣብ ሽወደን ከተማ ስቶክሆልም ተከቢሩ

ኣብ ሽወደን ኣብ ዋና ከተማ ስቶክሆልም ናይ ኤርትራ ኦርቶዶክስ ተዋህዶ ቤተ ክርስቲያን ደብረ ስሂን ኣቡነ ኣረጋዊ  ፩ ዓመታዊ ክብረ በዓል ናይ ጻድቕ ኣቡነ ኣርጋዊ ትማሊ ሰንበት 26 ጥቅምቲ 2014 ካብ ዝተፈላለያ ከተማታት ሽወደን  ብዝመጹ ልዕሊ 20 ዝኾኑ ሊቃውንት መምህራንን ካህናትን ዲያቆናትን ከማኡውን ብዙሓት ምእመናንን ምእመናትን ኣብ ዝተረኽብሉ ብዓቢ መንፈሳዊ ድምቐት ተኸቢሩ።

እቲ መደብ ካብ ቀዳም25  ጥቅምቲ ሰዓት ሓደ ድሕሪ ቀትሪ ብቀሞስ ኣባ ወልደስላሴ ብጸሎት ምስ ተኸፍተ ብኤግዚብሽን ጀሚሩ ፣መዝሙር ፣መንፈሳዊ ትረካ ፣መንፈሳዊ ድራማ  ቀሪቡ። ብድሕሪኡ  ኩሎም ካህናትን  ድያቆናትን ምስ ተኣኻኸቡ ታቦት ጻድቕ ኣቡነ ኣረጋዊ ብኽብሪ ብሊቃውንትን  ካህናትን መዘምራንን  ከምኡ ካኣ ኩሎም ምእመናንን ምእመናትን እንዳተዓጀበ ብኽብሪ ኣትዩ  ምስኡ ተተሓሒዙ ዋዜማ ስዒቡ። ምሸት ድሕሪ ድራር ኣብ ህዝቢ ብተደጋጋሚ ዝለዓሉን መብርሂ ዘድልዮምን ሕቶታት ብመልክዕ ቃለ-መሕትት  ብቐሺ አፈወርቅን  ብመም የማነን ሰፊሕን ብሩህን መልሲ ተዋሂቡ ። እዚ ሕቶን መልስን ብቐጥታ ብustream ይመሓላለፍ ስለ ዝነበረ ኣዝዩ ብዙሕ ህዝቢ ተኸታቲልዎ።

ንጽባሒቱ ሰንበት ሰዓት 3 ናይ ለይቲ ማሕሌት ጀሚሩ ብመርጌታ ተስፋይ (ጎንደሬ) እናተመርሐ ብብዙሓት ሊቃውንት ካህናትን ዲያቆናትን ማዕሪጉ ሓዲሩ። ጸሎተ-ቅዳሴ ምስ ተፈጸመ መርጌታ ተስፋይ ናይ ምስጋና ቃል ኣስሚዖም። ኣብ መወዳእታ ቀሺ ገብረ እግዚኣብሔር ነዚ ታቦት ንዝሃቡና ኣሕዋት ግብጻውያን ድሕሪ ምምስጋን ምእመናን ስቶክሆልም ብፍቕሪ ክግልገሉሉን ተኻፈልቲ በረኸት ክኾኑን  ሓደራ ኢሎም።

በረኸት ናይ ኣቡነ ኣረጋዊ ጻድቕ ምስ ኩልና ይኹን።

ነበርቲ ከተማ ሸለፍትዮን ከባቢአን ታቦትን ኣገልጋሊ ካህንን ረኺቦም

ኣብ ሰሜናዊ ክፋል ስዊዲን እትርከብ ሸለፍትዮ ኣብ ዝተባህለት ከተማን ኣብ ከባቢኡን ንዝርከቡ ኤርትራውያንን ኦርቶዶክሳውያን ምእመናን ዘገልግል፡ ብስም ሊቀ መላእክት ቅዱስ ገብርኤል ዝተሰምየ ታቦት፡ ትማሊ ዓርቢ ዕለት 10/10/2014 ብናይ ግብጺ ቤተክርስትያን ሊቀ ጳጳስ ኣብ ሃገራት ስካንድኒቭያ ብጹእ ኣቡነ ኣባኪር ብኽብ ዝብለ መንፈሳዊ ድምቀትን ጽምብልን ኣብ ናይ ክብሪ ቦታኡ ኣትዩ።

ነበርቲ ሸለፍትዮን ከባቢኣን ነቲ ኣብቲ ከባቢ ንመጀመርታ ግዚኡ ዝኣቱ ዘሎ ታቦት ብኽብሪ ንምዕጃብ፡ ካብ ማዕርፎ ነፈርቲ ኣትሒዞም ብደስታን ብሓጎስን “ታቦት በውስቴታ” እናዘመሩ ንታቦቶም ብዓቢ ድምቀትን ሓጐስን ተቐቢሎሞ።

ብጹእ ኣቡነ ኣባኪር ብምኽንያት እቲ ምእታው ታቦትን ምጅማር ወግዓዊ ቤተክርስቲያናዊ ኣገልግሎትን ኣመልኪቶም ንህዝቢ ኣብ ዘስምዕዎ ቃል፡ እቲ ኣብ ቤተክርስቲያን ኤርትራ ወሪዱ ዘሎ ከቢድ ናይ ፖለቲካ ሽግር ፍታሕ ክሳብ ዝርከብ፡ ምእመናን ስለ ቤተክርስቲያኖም ዘድሊ መስዋእቲ እናኸፈሉ ኣብ እምነቶምን ስርዓት ኣቦታቶምን ክጸንዑን ቃል እቲ ዘገልግሎም ዘሎ ካህን ከኽብሩን ኣተሓሳሲቦም። ወከልቲ ምእመናን ኣብ ዘስምዕዎ ቃል ድማ፡ ብፁእ ኣቡነ ኣባኪር ምስቲ ዘለዎም ናይ ግዜ ጽበት፡ ብኣካል ተረኺቦም ንዝገበሩሎም ቡራኬን ጸሎትን ብዓቢኡ ድማ ንዝተዋህቦም ታቦትን ምብራኽ ወግዓዊ ምጅማር ቤተክርስቲያናዊ ኣገልግሎትን ዝተሰምዖም ሓጎስ ልዑል ምዃኑ ብምምስጋን ገሊጾም። ኣብ መወዳእታ ናይ ሓባር ጸሎትን መዝሙርን ምስ ተገብረ ብጹእ ኣቡነ ኣባኪር ብወገኖም ንዝተገብረሎም ዕድመን ኣቀባብላን ድሕሪ ምምስጋን ቡራኬ ሂቦም ነቲ ህዝቢ ተፋንዮሞ።

ንጽባሒቱ ቀዳም፡ ናይቲ ቤተክርስትያን ኣገልጋሊ ቀሺ ተክለሃይማኖትን ካብ ሱንድስቫል ዝተዓደሙ ቀሺ ዑቕባ-ገብርኤልን ቀሺ ኣፈወርቅን ካብ ያቭለ ዝመጹ ቀሺ ገብረእግዚኣብሔርን ጸሎተ ቅዳሴ ኣካይዶም ። እቶም ዕዱማት ካህናት ድሕሪ ጸሎተ ቅዳሴ ንህዝቢ ኣብ ዘመሓላለፍዎ ቃል ምዕዳን፡ ቤተክርስቲያና ከነፍቅርን ነንሓድሕድና ክንፋቐርን ከምዘለናን ብሰፊሕ ኣረዲኦም። ናይቲ ቤተክርስትያን ካህን፡ ቀሺ ተኽለሃይማኖት ብወገኖም፡ ክቡር ሊቀ መላእኽቲ ቅዱስ ገብርኤል፡ ከምቲ ኣብ መንጎ መላኽቲ ተፈጢሩ ንዝነበረ ዘይምርድዳእ ከም ዝሃድእ ዝገበረ፡ ኣብዚ ቦታና ኸኣ ፍቕርን ምርድዳእን ከምጽእልና ተስፋ እገብር” ክብሉ ዘለዎም ሰናይ ድሌት ገሊጾም።

ኣብቲ ሰፊሕ ዝርግሓን ብዙሕ ስደተኛ ህዝቢ ዘለዎን ከባቢ፡ ናይ ኦርቶዶክሳዊት ተዋሕዶ ቤተክርስቲያን ታቦት ብዘይምንባሩ፡ ህዝቢ ምስጢራተ ቤተክርስቲያን ኣብ ግዚኡ ንምክፋል ከጸግሞ ከምዘጸንሐ ዝፍለጥ እዩ። እዚ ኣትዩ ዘሎ ታቦት ግና ነቲ ኣብቲ ከባቢ ዝነበረ ጸገም ከቃልሎ ልዑል ትጽቢት ተጌሩሉ’ሎ።

ነዚ ዘርኣየና እግዚኣብሄር፡ ክብርን ምስጋናን ይኹኖ !!

ስለ ግዳያት ላምፓዱዛ ጸሎተ-ፍትሓት ተኻይዱ

ኩላተን እተን ኣብ ሃገር ሽወደን ዝርከባ ቀኖናዊ ስርዓት ተኸቲለን ዝኽዳ ዘለዋ ኣብያተክርስቲያን ስለ እቶም ኣብ ዝሓለፈ ዓመት ኣብ ማእከላይ ባሕሪ ህይወቶም ዝሰኣኑ ኣማኢት ኤርትራውያን ኣሕዋትናን ኣሓትናን ትማሊ ሰንበት 05-10-2014 ቀዳማይ ዓመቶም ምኽንያት ብምግባር ጸሎተ ፍትሓት ኣካይደን። ኣብ ዝሓለፈ ዓመት ማለት ዕለት 3 ጥቅምቲ 2014 ኣብ ልዕሊ ኤርትራውያን ዝወረደ ሓደጋ ባሕሪ ንዓለም ዘደንጸወን ውርደት ኤርትራውያን ካኣ ብጋህዲ ዘንጸባረቐን ፍጻሜ ምንባሩ ናይ ቀረባ ተዘክሮ አዩ። ህልቂት ንእስነቶም ዘይመነዉ መንእሰያትን ኣፎም ዘየጽረዩ ነኣሽቱ  ህጻናትን ብፍላይ ካኣ እታ እናሞተት ዝወለደት  ኣደን ንኹሉ ሰብ ዘስደመመን ሓቀኛ ምስልና ዘርእየን ኩነት እዩ። እምበእርከስ በዚ ኣጋጣሚ ምርኩስ ብምግባር ጓይላን ዕንደራን ገዲፍና ኣምላኽ ንመከራና መወዳእታ ክገብረሉ ኣብ ጸሎትን ምህልላን ክንጽመድ መንፈሳዊ መልእኽትና ከነመሓላልፍ ንፈቱ።

ስብሓት ሎቱ።

ሓበሬታ

ሓደ ኣካል እንተተሳቐየ ኩሉ እቲ ኣካላት ምስኡ ይሳቐ!!! (1ቆሮ 12: 27)

ብስም ኣብን ወልድን መፈስቅዱስን  ሓደ ኣምላኽ ኣሜን

ናብ ክቡራን ህዝበ ክርስቲያን ኣብ ርሑቅን ቀረባን እትርከቡ፥ ካብ እግዚኣብሔር ኣቦናን ካብ ጎይታና ኢየሱስ ክርስቶስን ጸጋን ሰላምን ኣብ ዘዘሎኹሞ ንዓኹም ይኹን።

ቀጺልና ቅድሚ ሒደት መዓልታት ካብ ሊብያ ናብ ኤውሮጳ ክሰግሩ ዝተበገሱ  ኤርትራውያ ዝሓዘት መርከብ ብምጥሓላ ልዕሊ 155 ዝበጽሑ ብዙሓት ኣሕዋትናን ኣሓትናን ክብርቲ ህይወቶም ከምዝሰኣኑን  ካልኦት ካብኣቶም ዝበዝሑ ተሳፈርቲ ዝሓዘት መርከብ እውን ደሃይ ከምዘይብላን ኩልና ንሰምዖ ዘለና ሓቂ እዩ። ብሰንኪ’ዚ ጸሓይ ሰረቐ ዘጋጥም ዘሎ ህልቂት ክንደይ ስድራቤታት ይዝኽትማን  ብዙሓት ወለዲ ኣላዪ ዘይብሎም ብሓዘን ተኾርምዮም ይተርፉ ከምዘለዉን ንኹልና ብሩህ እዩ። ስለዚ ኣምላኽ ንመከራና ገደብ ክገብረሉ: ነቶም ዝሞቱ  ዕረፍቲ ነብሲ ክህቦም ንቤተሰቦም ድማ መጸናንዒ መንፈስ ምእንቲ ክሰደሎም ኩልና ሓቢርና ንኣምላኽ ክንልምኖ መንፈሳውን ሞራላውን ግዴታ ኣሎና::

በዚ መሰረት ኣብ ኩለን ኣብ ሽወደን ዝርከባ  ኣብያተ ክርስቲያን ኦርቶዶክስ ተዋህዶ ኤርትራ ስለ እቶም ዝሞቱ ጸሎተ ፍትሓት: ከምኡ  ካኣ ኣብ ማእከላይ ምብራቕ ብፍላይ ድማ ኣብ ዒራቅ ኣብ ልዕሊ ብእምነት ኣሕዋትናን ኣብታ ኣብ ኣምላኽ ዘላትና ተስፋ መኻፍልትናን  ዝኾኑ ክርስቲያን ዘጋጥም ዘሎ መከራን ሞትን ኣምላኽ ካብቲ ወሪድዎም ዘሎ ጸበባ ከናግፎምን ክረድኦምን ንዝመጽእ ዘሎ ሰንበት ዕለት 17/08/2014  ጸሎት ክካየድ ስለ ዝኾነ ተሳተፍቲ ክትኮኑ ነተሓሳስብ። ንዝያዳ ሓበሬታ ናብ ቀረባኹም ዘሎ ቤተክርስቲያን ብምድዋል ተወከሱ።

ብደሓን ምጹ

ክፍሊ ዜናን ሓበሬታን

11 ነሓሰ 2014።

{flike}

stockholm-rally

ኣብ ስቶክሆልም ኩነታት ክርስቲያን ኣብ ዒራቕ ዝርኢ ዓቢ ሰላማዊ ሰልፊ ተኻይዱ

stockholm-rallyበስመ ኣብ ወወልድ ወመንፈስ ቅዱስ ኣሓዱ ኣምላክ ኣሜን ።

ትማሊ ሰንበት ዕለት 09/08/2014 ካብ 6000 ክሳብ 10000 ምእመናንን ምእመናትን ዝተሳተፍዎ ዓቢ ሰላማዊ ሰልፊ ኣብ ከተማ ስቶክሆልም ተኻይዱ። እቲ ብኣመንቲ ኦርቶዶክስ ቤተክርስቲያን  ሶርያን ዝተፈላለያ ስቪካውያን ማሕበራትን ዝተኻየደ መጠነ ሰፊሕ ሰለማዊ ሰልፊ ኣንጻር እቲ ብIsis ዝተባህሉ እስላማውያን  ኣብ ኢራቕን ሶርያን ኣብ ልዕሊ ንጹሃት ክርስቲያን ዝፍጽምዎ ዘለዉ ቅትለትን ስደትን ዝቐንዐ እዩ ኔሩ። እቶም ሰልፈኛታት እዚ ኣጋጢሙ ዘሎ  ዘይንቡር ተርእዮ ብህጹጽ ደው ክብል ማህበረሰብ ዓለም ብሓፈሻ ሽወደናውያንን ሕብረት ኤውሮጳን ካኣ ብፍላይ ኣቓልቦ ክገብሩሉ ተማሕጺኖም።

ዝተፍላለያ ማዕከናት ዜና ሽወደን ከምዝሓበራኦ ኣብቲ ሰላማዊ ሰልፊ ብዙሓት ናይ ሽወደን መራሕቲ ፓርትታትን  ናይ ሕብረት ኤውሮጳ  ምኒስተርን ተረኺቦም ኔሮም።
ከም ዝፍለጥ Isis ዝተባህለ እስላማዊ ጥርኑፍ ሓይሊ ኣብ ልዕሊ ኢራቓውያንን ሶርያውያንን ክርስቲያን  ክልተ ምርጫ ማለት ወይ ናብ ምስልምና ቀይሩ ወይ ቀረጽ እንዳከፈልኩም ንበሩ ብምባል ከዘዋጠርዎምን  ህጻናት ዝርከብዎም  ኣዝዮም ብዙሓት ሰባት ከምዝቐተሉን ዝተፈላለያ መራኸቢ ብዙሃን ክዛረባሉ ጸኒሓ ኣለዋ።

ካብዚ ብምብጋስ ኩለን ኣብያተክርስቲያን ኦርቶዶክስ ተዋህዶ ኤርትራ ኣብ ሽወደን ነቲ ሓደገኛ ኩነት ብትሪ እናኾነና ከም መግለጺ ደገፍ እቶም ውጹዓት እመንቲ ክርስትና ንሰንበት ዕለት 11 ነሓሴ 2006 ብግእዝ ወይ ድማ 17 augusti 2014 ናይ ጸሎት ስነ ስርዓት ከካይዳ እየን።
ስብሃት ለእግዚኣብሔር
ወለወላዲቱ ድንግል
ወለመስቀሉ ክቡር::

ክፍሊ ዜናን ሓበሬታን።

{flike}

እምነት ምእመናን ዘግሃደ ጽምብል ኣብ ከተማ ያቭለ ተጸምቢሉ

በስመ አብ ወወልድ ወመንፈስ ቅዱስ አሐዱ አምላክ አሜን።

ብሓድነቱን ሰለስትነቱን እንዳተመስገን ዚነብር ህያው አምላክና ምስግና ይኩኖ፡ ናብ’ዚ ቅዱስ ዕለት እዚ ብሰላም ብጥዕና አብጺሑ ናይ ቅድስት ስላሴ በዓል ንምብዓልን  ንምስታፍን ስለ ዚፈቀደልና ልዑለ ባህርይ አምላክና  ክብሪ ይኹኖ።

ኣብ ሃገረ ስዊዲን፡ ያቭለ ኣብ እትበሃል ከተማ እትርከብ ናይ ኤርትራ ኦርቶዶክስ ተዋህዶ ቤተክርስቲያን፡ ዓመታዊ ክብረ በዓል ቅድስት ስላሴ  ትማሊ ቀዳም 19 ሐምለ 2014፡ ካብ ዝተፈላለያ ከተማታት ሽወደን ብዝመጹ ልዕሊ 30 ዝኾኑ ሊቃውንት መማህራን፡ ካህናትን ዲያቆናትን  ከምኡ’ውን ልዕሊ 500 ዝኾኑ ምእመናንን ኣብ ዝተረኽቡሉ፡ ብዓብዪ መንፈሳዊ ድምቀት ተጸምቢሉ፥ እቲ ጽምብል ካብ 18 ሐምለ ሰዓት 18፣00 ድ,ቀ ምቅባል አጋይሽ ጀሚሩ ካብ ሰዓት 20፣00 ድ,ቀ  መዝሙር ብመዘምራን ቤተክርስቲያን ቅድስት ሥላሴ   ያቭለ ብመዘምራን ቤተክርስቲያን ቅድስት ማርያም ሳንድቪከን ፥ብመዘምራን ቅዱስ ሚካኤል ሱንድስቫል፣ ብመዘምራን  አቡነ አረጋዊ ስቶክሆልም ከምኡ ውን ካብ ዚተፈላለዩ ማሕበራት ዚመጹ መዘምራን ተሳቲፎሞ።

መደብ ብጸሎት ምስ ጀመረ ብዝተፈላለየ መደባት ማለት ትምህርት፡ ሓፈሻዊ ፍልጠት ማዕሪጉ አምስዩ። ካብ ከባቢ ሰዓት 2 ድማ ማህሌት ተጀሚሩ መርጌታን ተስፋይ( ጎንደሬን )መርጌታ አፈወርቅን ብብዙሓት ሊቃውት ካህናትን ዲያቆናትን ማዕሪጉ ሓደረ።ከባቢ ሰዓት 6፣ ቅዳሴ ተጀሚሩ ቅዳሴ ድሕሪ ምዝዛሙ ብሊቃውንቲ እናተሰነየ ዑደትን ጸሎተ ምህልላ ስለ ህዝብን ሃገርን  ተከየዱ፣  ኣብ መወዳእታ ብኣገልጋሊ ቤተክርስቲያን ቅድስት ስላሴ  ቀሺ ገብረእግዚአብሔር ቃል ምስጋና  ምስ ተዋህበ: ዕዱማት ናብቲ ብኣማንያን ዝተዳለወሎም ናይ ምሳሕ እንግዶት ኣምሪሖም። ነዚ ዝገበረ ህያው አምላክና ዚከበረን ዚተመስገን ይኩነልና።

ስብሃት ለእግዜአብሄር 
ወለወላዲቱ ድንግል

{flike}

ምጅማር ናይ ሓባር መርበብ ሓበሬታ http://eotcs.se

ዓቢ ብስራት ኣብ ሃገረ ሽወደንን ኣብ መላእ ዓለምን ንእትርከቡ ኦርቶዶክሳውያን ኣገልገልትን ምእመናንን

በስመ ኣብ ወወልድ ወመንፈስ ቅዱስ፣ ኣሓዱ ኣምላክ፣ ኣሜን!

   ምጅማር ናይ ሓባር መርበብ ሓበሬታ http://eotcs.se/  
ኣብ ሃገረ ሽወደን ናይ ዝርከባ መላእ ኦርቶዶክሳውያን ኣብያተ ክርስቲያን ኤርትራ

 

ንሕና ኣብ ሃገረ ሽወደን እንነብር ናይ ኤርትራ ኦርቶዶክስ ተዋሕዶ ቤተ-ክርስቲያን ኣገልገልትን ምእመናንን፣ ንጥንታዊ እምነትናን ሕጊ ቤተክርስቲያንናን ንምሕላው፣  ብቀኖናዊ መገዲ ኣብ ትሕቲ ናይ ግብጺ ቤተ-ክርስቲያን፣ ብናይ ስካንዲነቪያን ጳጳስ፡ ብጹዕ ኣቡነ ኣባኪር፡ ብምምእካል፣-

  1. ኦርቶዶክሳዊት ተዋህዶ ቤተክርስቲያን ኤርትራ ካብ ዝኾነ ግዳማዊ ጸቕጢ ነጻ ኮይና፣ ናይ ዘመናት ሓዋርያዊ ሰረተ-እምነታን ሰንሰለታዊ ርክባን ዓቂባ፣ ሓዋርያዊ ተልእኾኣን ጻውዒታን ብጽፈት ከይትዓምምን ብቑዕ መንፈሳዊ ኣገልግሎት ከይተበርክትን ኣብ ከቢድ ናይ ፈተና እዋን ከምዘላ ብምግንዛብ፣
  2. ናይ ሓባር ባይታ ንዘይረኸቡ ኣገልገልትን ምእመናን፣ ኣገልገልቲ ጽሑፋቶም ብምእኩል ኣገባብ ዝዝርግሑሉ፣ ምእመናን’ውን ንዝረኽብዎ መንፈሳዊ ጽሑፋት ውሕስነቱን ተኣማንነቱን ኣረጋጊጾም ከንብብሉ ዝኽእሉ ናይ ሓባር ባይታ ክፍጠር ከምዝግባእ ኣገዳሲ ምዃኑ ኣብ ግምት ብምእታው፣
  3. ህሉው ኩነታት ናይተን ኣብ ሃገረ ሽወደን ዘለዋ ኦርቶዶክሳውያን ኣብያተ ክርስቲያን ብዝምልከት፣ ናይ ሓባር ማዕከን ሓበሬታ ከምዘየሎ ብምግንዛብ፣
  4. ሕቶታት ምእመናን ግቡእ፣ ምእኩልን ርትዓውን መልሲ ኣብ ክንዲ ዝረክብ፣ ንሓደ ሕቶ ካብ ዝተፈላለዩ ምንጭታት ዝተፈላለየ መልሲ ይረክብ ከምዘሎ ኣብ ግምት ብምእታው፣
  5. ሓፈሻዊ ዜናን እዋናዊ ሓበሬታን ቤተክርስቲያንና ብርትዓዊ ኣገባብ ንምእመናን ንምሕባር ኣገዳሲ ምዃኑ ብምግንዛብ

ኣብ ሃገረ ሽወደን ናይ ዝርከባ መላእ ኦርቶዶክሳውያን ኣብያተ ክርስቲያን ኤርትራ፣ ናይ ሓባር መርበብ ሓበሬታ ኣዳሊና ከምዘለና ብሓጐስ ነበስር።

እዚ http://eotcs.se/ ዝብል ናይ ኩለን ኣብ ሃገረ ሽወደን ናይ ዝርከባ መላእ ኦርቶዶክሳውያን ኣብያተ ክርስቲያን ኤርትራ፣ ናይ ሓባር መርበብ ሓበሬታ፣-

  • ሚዛኑን ርትዑን ዝሓለወ ብቑዕ መንፈሳዊ መግቢ ብምድላው፣ መንፈሳዊ ኣፍልጦ ምእመናን ንምዕባይ
  • ኣብ ኩሉ ኩርናዓት ዘለዉ ምእመናንን ኣገልገልትን፣ ህልዉ ኩነታት ቤተክርስቲያን ዝፈልጡሉ ባይታ ንምፍጣር
  • ብዝተፈላለየ መገዲ ናይ ጽሑፍ ኣገልግሎት ከገልግሉ ንዝኽእሉን ንዝደልዩን፣ ምእኩል ባይታ ንምፍጣር
  • ምእመናን መንፈሳዊ ጉስነትን ኣገልግሎትን ክረኽቡ ኣብ ዝደልዩሉ፣ ኣብ ከባቢኦም ናይ ዝርከቡ ኣገልገልቲ ቁጽሪ ተለፎንን ናይ ኢመይል ኣድራሻን ብምሕባር፣ ብቐሊሉ ምስ ኣገልገልቲ ተራኺቦም መንፈሳዊ ጉስነት ከምዝረኸቡ ንምግባር
  • ምእመናን ንዝህልዎም መንፈሳዊ ሕቶታት፣ ምእኩልን ብቑዕን መልሲ ንምቕራብ

ብጸሎት ቅዱሳንን ብረድኤት እግዚኣብሄርን ንዓቢ ዕዮ ተበጊስና ምህላውና፣ ደጊምና ብሓጐስ ነበስር

ይትባረክ እግዚኣብሔር ኣምላከ ኣበዊነ!!

ኣካየድቲ መርበብ ሓበሬታ http://eotcs.se/