መልስኻ /  እወ  እንተድኣ ኮይኑ ፣ ኣብነት ንክኾነካ ሓደ  ብዓወት ኣፍደገ ሞት ዛዚሙ ኣፍደገ ሕይወት ዝኸፈተ ኣቦ  ከምጽኣልካ፡ ምንባብንን
፣ ምስትውዓልን ግና  ናትካ /ኪ ግደ እዩ።

መቸም እንተ ብብዙሕ ወይ ሒደት ኩላትና ዛንታ ዮሴፍ ኣንቢብና ወይ ሰሚዕና ኣሎና፣ ዮሴፍ ገና መንእሰይ እንከሎ እዩ ናይ ህይወት ውጻእ ውረድ ክሓልፍ ጀሚሩ፣ እዚ ካብ ንእስነቱ ንእግዚኣብሄር ምፍራህ እንታይ ማለት ምዃኑ ዝርዳእ መንሰይ፣ ብድሆ ህይወት ኣብ ውሽጢ ቤቱ እዩ ጀሚርዎ።

ዮሴፍ ኣብ ቤቱ ብጽፈትን ብስነ ስርዓትን ይመላለስ ስለ ዝነበረ ነዚ ዘይፈተዉ ኣሕዋቱ ግና በይናውነትን ተንጸሎን መታን ከጥቅዖ ብምባል ነጺሎሞ እዮም፣ ብርግጽ ተንጽሎ ቀሊል ኣይኰነን፣ ብፍላይ ድማ እቶም ቀረባኻ ናትካ ትብሎም ካብ እኩይ መንፈስ ተላዒሎም ክፈልዩኻ ከለዉ ዝወርደካ መንፈሳውን ስነ ኣእምራውን ጭንቀት ዓቢ እዩ፣

እንሓንሳብ ከምዚ ዝዓይነቱ ፈተና ንኽትጸሮ እምብዛ ከቢድ እዩ፣ ዮሴፍ ግና ካብ ኣሕዋቱ ብዝወርዶ ዝነበረ ተንጽሎ ተስናቢዱ ምስኦም ብፍጹም ክደናገጽ ኣይተራእየን፣ ብኣንጻሩ ነዚ ብዲሁ ጉዕዞ እምነቱ ክቕጽል ከሎ እዩ ተራእዩ፣ ንሕና መንእሰያት ብዙሕ ጊዜ ብሰንኪ እንኽተሎ መንገዲ እምነት ካብ ቤትናን ጎረባብትናን መቕርብና ዝወርደና ተንጽሎ ኣዚዩ ዓቢ እዩ። ገለ ነዚ ሰጊሮም ደው ክብሉ ከለዉ ገለ ግና ካብ ተንጽሎ ንምህዳም ንእምነቶም ንድሕሪት ዝጐቱ ኣዝዮም ብዙሓት እዮም።

ሰባት ክገድፉኻ ምስኻ ድማ ምድንጋጽ ከቋሩጹ ይኽእሉ እዮም፣ ከምዚ ስለ ዝዀነ ግና ንስኻ ክትሰናበድ የብልካን። ከመይሲ እቲ ዘይንጽልን ዘይርሕርሕን ኣምላኽ ምሳኻ ስለ ዘሎ። ዮሴፍ ገና ኣብ ንኡስ ዕድሚኡ ከምዚ ዝዓይነቱ ተነጽሎ ክገጥሞ እንከሎ መዕረ ኽንደይ ከቢድዎ ከምዝነበረ ርድኡ እዩ። ወትሩ ኣብ ገዛ መጺኡ ዝተጸወጋ ገጻት ኣሕዋቱ ክርኢ ጽቡቕ ይስምዖ ኣኣይነበረን። ንሱ እውን ሰብ ስለ ዝዀነስ ፍቕሪ የድልዮ እዩ። ዮሴፍ ግና ብሰንኪ ኣንጻር ሓጥያት ዝነበሮ ንጹር መርገጺ ነዚ ሕውነታዊ ቤተሰባዊ ፍቕሪ ከም ዝግባእ ኣየሰተማቖሮን። ዮሴፍ ግና ውሕስነት ህይወቱ ኣብቲ ኩሉ ዝኽእል ኣግዚኣብሄር ስለ ዝገበረ ኣብ ጉዑዞ ህይወቱ ኣይደኸመን።

ንሕና ኣብዛ ጸልማት ዝኸብባ ዓለም ንነብር ስለ ዘሎና። ብቕድስናን ንጽህናን ክንመላለስ እንከሎና ካብዛ ፍትሓዊት ዘይኰነት ዓለም ኣድልዎን ግፍዕን ክበጽሓና ናይ ግድን እዩ ። እንሓንሳብ ይግባኣና እኳ ክነሱ ብሰንኪ ኣብ ኣምላኽ ዘሎና እምነት መሰልና ዝግፈፈሉ እዋን ብዙሕ አዩ፣ ብርግጽ እዚ ከቢድ ምኻኑ ፍሉጥ እዩ። ይኹን እምበር በዚ ተሰናቢድና ስፍራና ክንሓድግ የብልናን።

ዮሴፍ ኣብ ቤቱ እቲ ዝግብኦ ኩሉ እናገበር እንከሎ እዩ ዝገብኦ ዘይረኸበ፣ ይኹን እምበር በዚ ሰንቢዱ ዕርፉ ኣይደርበየን። ሎሚ ንሕና ንገብሮ ዘበል ኩሉ ካብ ሰባት ናእዳን ክብርን ክንረክብ ዘይኰነስ ካብቲ ኩሉ ዝኽእል ኣምላኽ ዓስቢ ንምርካብ እዩ ክኸውን ዘለዎ። እቲ ቅዱስ ጹሑፍ እውን ክነግረና ከሎ እትገብርዎ ዘበለ ኩሉ ንኽብሪ ኣምላኽ ብጐይታ የሱስ ክርስቶስ ግበርዎ እዩ ዝብል።

ኩቡራት መንእሰያት እዚ ሕጂ ብሰንኪ ኣብ ጐይታ ዘሎና ፍቕሪ ካብ ቤተሰብ ጀሚሩ ክሳብ ካልኦት ዝበጽሓና ተነጽሎን ዘይፍትሓውነትን ውን ነቲ ኣብ ዝመጽእ እንረኽቦ ዓቢ ክብሪ ብፍጹም ከምዘይማዓራረዮ ፈሊጥና ወትሩ የዒንትና ናብቲ ከኣሊ ኩሉ ዝኾነ ኣምላኽ ንጠመት። ናይ ዮሴፍ ፈተና ተነጽሎ ጥራይ ኣይነበረን። ካብቶም ፈተውተይ ዝብሎም ኣሕወቱ ዓቢ ኽሕደት እዩ ገጢምዎ። ኣምላኽ ኢዱ እንተ ዘየኣቱ ኔሩ ድማ ንሞት እዮም ፈርዶሞ ኔሮም።

2ይ ክፋል ይቕጽል…..

ይትባረክ ኣምላከ ኣበዊነ።

ቤት ኣቦይ እምብዛ እዩ ጥዑም፣ ኣቦይ ሓንቲ መዓልቲ እኳ ትኹን ገጹ ጸዊጉ ጠሚትኒ ኣይፈልጥን፣ ክብድል እንከለኹ ፍቕራዊ ዝዀነ ኣባታዊ ምኽሪ እናለገሰ መንገዲ እናርኣየ ኣብ ግቡእ መስመረይ ኢዩ  ዘትሕዘኒ። ኣቦይ ንእሽቶይ ኢሉ ካብ ሓላፍነት ነጻ ኣይገበረንን። ኣሚኑ እቲ ክገብሮ ዝግባኣኒ ንኽግብር የተባብዕኒ ነበረ። ኣቦይ ከም ወላድየይ ጥራይ ዘይኰነ ከም ዓርኹ ጌሩ ይርእየኒ ስለ ዝንበረ ካባይ ዝሓብኦ ምስጢር ፈጺሙ ኣይነበረን። ብሓፈሻ ኣብ ናይ ፍቕሪ ሃዋህው ዝዓብለሎ ገዛ እየ ዓብየ። እዚ ዝነበረኒ ሓለፋታት ግና በበቑሩብ ሕንቃቐ ከሕድረለይ ጀመረ። ንገዛእ ርእሰይ ድማ ክሳብ መዓስ እየ ጽግዕተኛ ዝኸውን፧  ሕጂ መንእሰይ ኣኺለ እየ ከምቲ መንእሰይ ዝገብሮ ድማ ክሕጐስን ክዕንድርን እዩ ዝግብኣኒ። ኣነ ዝሰኣንክዎ የብለይን ነፍሰይ ግና ከም ስእንቲ ተዕነኒ ኣላ። እዚ ዘለኽዎ ወርቃዊ ዕድመ ሕጂ ክሕጐሰሉን ክፍስሃሉን እንተ ዘይኪኢለ ዳሕራይ ምስ ኣረግኩ ክጥዐስ ይኽእል እየ ዝብል ሓሳባት ክመላለሰኒ ጀመረ። እዚ ከምዚ ዝዓይነቱ ሓሳባት ንኣእምሮይ ኣናወጾ፣ ብልበይ ድማ ካብ ገዛይ ክወጽእ ወሰንኩ፣ ኣብዚ ከምዚ ናይ ወጥሪ እዋን ፍቕሪ ኣቦይን ሓልየቱን ይረኣየኒ ግና ሓንሳብ ስለ ዝወሰንኩ ንድሕሪት ክምለስ ኣይደለኹን። ኣብዚ ከምዚ እዋን ብዙሕ ዝን ምባል ስለ ዘብዝሓኩ ኣቦይ እምብዛ ክቐርበኒ ጸገመይ ንምርዳእ  ክሓተኒ ገጹ ከይለወጠ ድማ ክሓቕፈኒ ጀመረ። ሓንቲ መዓልቲ ድማ ተቢዐ ነቦይ “ኣቦ ኣነ ሓደ ነገር ደልየ ኣለኹ” በልክዎ፣ ኣቦይ ድማ “እንታይ እዩ እዚ ወደይ ኢሉ መለሰለይ፣” እቲ ኣብ ልበይ ዘሎ ኩሉ ዳሕዳሕክሉ፣ ኣብ ቤት ኣቦይ ናብራ ከም ዝደለኽዎ ከም ዘይኰነ፣ ስለዚ ካብ ዘለዎ ሃብቲ እቲ ንዓይ ከውርሰኒ ዘለዎ ክህበኒ እሞ ርእሰይ ክኽእል በይነይ ኰይነ ናብ ካልእ ዓዲ ክኸይድ ከም ዝደሊ ሓበርክዎ። ኣቦይ ገጹ ብሓንሳብ ተደወነ፣ ስለምንታይ ክብል ድማ ሓተተኒ። ኣነ ኸኣ ምርጫይ እዩ ኢለ መለስክሉ። ኣቦይ ኣብ ፍቓደየ ኣትዩ ክዕምጽጸኒ ኣይደለይን፣ ወደይ ትወስዶ ዘሎኻ ስጉምቲ ሰናይ ኣይኰነን፣ ዘይትሓስበሉ ግዳ በለንኒ። ኣነ ድማ ሓንሳብ ካብ ልበይ ወሲነ ኣየ፣ ዝገብሮ ዘለኹ እፈልጦ እየ ጥራይ ዝበልኩኻ ሃበኒ በልክዎ። ኣቦይ ድማ ካብ ፍቓደይ ኣይወጽአን፣ ዘድልየኒ ሂቡ ኣፋነወኒ። ኣነ ድማ ዝተሓዝ ትሕዝቶይ ሒዘ ናብ ርሑቕ ዓዲ ተበገስኩ። ኣብቲ ዝደለኽዎ ዓዲ ምስ በጻሕኩ ንገዛእ ርእሰይ ከም ሓንቲ ኣብ ዘመን ህይወታ ረኺባቶ ዘይትፈልጥ ኩቡር ዕጫ ዝረኸበት እሞ ዓቢ ክብሪ ከም ዝበጽሓ ጌረ ቖጸርክዋ፣ ነፈሰይ ብሓጐስ ተጨንድሐት። እዋይ ኣብ ከመይ ዝኣመሰለ ባርነት ኰን እየ ኔረ፧ ብምባል ድማ ምስ ገዛእ ርእሰይ ክዛረብ ጀመርኩ።  እታ ኸተማ ካብ ጽባቐኣ ዝተላዕለ ብዙሕ ዝዓይነቱ ባህታ ዝህብ ነገራት እዩ ኔርዋ። ንኹሉ ክፍትኖን ክጥዕሞን ድማ ወሰንኩ። ማእለያ ዘይብሎም ኣዕሩኽ ኣጥረኹ። ሳላ እቲ ቡሩኽ ኣቦይ ገንዘብ ኣይተሳእነን ። ዕንደራን ዳንኬራን ናተይ ኢለ ተታሓሓዝክዎ። ኣብታ ኸተማ ኣብ ዝሓጸረ ግዜ ስመይ እምብዛ ገነነን ዓበየን። ሰባት ብኣይ ክዛረቡ ጀመሩ። እዚ ኣዚዩ ዓቢ ፍናን ወሰኸለይ። ንምድረ ሰማይ ኣይትጹሩኒ ክብላ ጀመርኩ። ብገንዘብ ኩሉ ዝዕደግ ስለ ዝመስለኒ ኣሎ ዝብሃል ንነፍሰይ ሓጐስ ይህባ እዩ ዝበልክዎ ኩሉ ፈተንኩ። ፍትወት ስጋ ንነፈይ ተቖጻጸራ። ንብረት እዛ ዓለም እዚኣ ኩሉ ከም ማሕዘል ቆልዓ ኣብ ዝባነይ ተሓንገጠ። ነፍሰይ ብሓጥያት እምብዛ ተፈስሐት። ሰባት ፈትዮምኒ ዘይኰኑስ ንገንዘበይ ክብሉ ክቐርቡኒ ጀመሩ። ምስትውዓሉ ዝተደፍነ ሰብ እንታይ ከምዝገብር ስለ ዘይፈልጥ ድማ ነዚ ሜላ ኣየስተውዓልክዎን፣ ገንዘበይ ድማ ቀስ ብቐስ ኩሉ ተወደአ። ናብራይ ክልወጥ ጀመረ፣ ተደናገርኩ፣ ግና ፈተወተይ ስለ ዝነበሩ ናብኦም ተጸጋዕኩ። ንቑሩብ ግዜ ምስኦም ምስ ጸናሕኩ ግና ሰባት ርጉማት  ሓጸርቲር ኣእዛን  ስለ ዝኾኑ ዝባኖም ሂቦም ከዋርዱኒ ጀመሩ። ከምዛ ስመይ ዘይገነን ኣብ ሓጺር ዓመታት ስመይ ክብለል ጀመረ። ታሪኽ ዘይብለይ ሰብ ኰንኩ። ኩሉ ክንዕቐኒ ጀመረ። ሕሉፍ ሓሊፈ ነዛ ዝበለዓ ቁራስ እንጌራ እኳ ሰኣንኩ። ስራሕ ክደሊ ጀመርኩ፣ ግና መን ከእትወኒ፧ ኣብ መጨረሻ ኣብ ሓደ ቦታ ስራሕ ረኸብኩ ግና ስራሕ ዘይኰነስ ውርደት እዩ። ነፍሰይ እምብዛ ተመረረት፣ ብገዛእ ኣእዳወይ ንህይወተይ ከጥፍእ ተደናደንኩ። ምንባረይ ኣጽልኣኒ፣ ልበይ ብጣዕሳ መልአ ኣብ ቤት ኣቦይ ዝነበርኒ ሕንቃቐ  ኩሉ ተዘከርኒ። ፍቕሪ ኣቦይን ፣ሓልዮቱን ኣበይ ክረኽቦ ሕጂ   ንብዓት መዓልታዊ ቀለበይ ኰይኑ ዝገበሮን ፣ ዝሕዞን ጠፋኣኒ። ካብ ቤተ ኣቦይ ኮብሊለ ምውጽኣይ ድማ እምብዛ ኣጣዐሰኒ። ኣበሳ ከም ዝገበርኩ ድማ ተረደኣኒ። ናብ ቤት ኣቦይ ክምለስ ይደሊ እሞ ግና ኣቦይ ንዓይ ንዘራዊ ገንዘብ ከመይ ጌሩ ክቕበለኒ  እናበልኩ ነግ ፈርረ እብል። ሕልናይ እውን ንስኻ ገበነኛ እናበለ ኣሳቐየኒ። ካብ ኩቱር ጭንቀት ዝተላዕለ ገጸየ ብማዳ ተደወነ። ዝረኣየኒ ኩሉ ጋገየኒ። ከምታ ቤታ ሓዲጋ ዝኾብለለት ርግቢት ኰንኩ። ኣብ መወዳታ ብልበይ ክምለስ ኣሎኒ እንተ ተቐበለኒ ሰናይ እንተ ዘይኰነ ኣብ ብርኩ ተደፍኣየ ከምቶም ሰራሕተኛታት ገዛና ዀይነ ክቑጽር ክልምኖ እየ፣ ብምባል ናይ መጨረሻ ውሳኔ በጻሕኩ። ንውሳኔይ ኣብ ግብሪ ንምውዓል ድማ ብዙሕ ገድሊ ተጋደልኩ። እቲ እንኰ ናይ መጨረሻ ውሳኔ ቅድሚ ሞተይ ክገብሮ ዘሎኒ ናብ ቤት እቲ ፈቃር ኣቦይ ክምለስ ኣሎኒ ኢለ ንዝወሰንክዎ ኣብ ግብሪ ከውዕሎ ኣእጋረይ ናብ ቤተ ኣቦይ ኣቕናዕኩ። ካብ ቤት ኣቦይ መሊኣ እየ ወጺኤ ሕጂ ግና ጥራሕ ኢደይ እምለስ ኣለኹ። ካብ ቤት ኣቦይ ምስ ግርማይ እየ ወጺኣ ሕጅ ግና ሞጐሰይ ተቐንጢጡ እምለስ ኣለኹ። ምስ ገዛእ ርእሰይ እናተማጐትኩ ከይተፈለጠኒ ኣብ ጥቓ ገዛና ቐረብኩ። ብማዕዶ ኣቦይ ዝን ኢሉ ከምዚ ገለ ነገር ዝጽበ ዘሎ ኣማዕድዩ ይጥመት ነበረ። ኣቦይ ካብ ልቡ ከም ዘየውጻኒ እዚ ምልክት ኰነኒ። ኣቦይ ብማዕዶ ምስ ረኣየኒ እናሳሓቐ እናዘለለ ናባይ ክመጽእ ረኣኽዎ። ንብዓተይ ኣውያተይ ምቁጽጻር ሰንኩ፣ መጺኡ ምስ ጽያፈይ ሓቝፉ ሰዓመኒ። ምእማን ሰኣንኩ ኣብ እግሩ ተደፍየ ምሕረት ሓትትኩ፣ ከም ወዱ ዘይኰነ ከም ሓደ ተራ ሰራሕተኛ ክርእየኒ ተማሕጸንክዎ። ኣቦይ ካብ ተደፊአሉ ዝነበርኩ ኣተንሲኡ ሓድሽ ክዳን ክገብሩለይ ክዳን ምስ ኣቦይ ከሕጐስ ቀለቤት ክገብሩለይ ኣዘዘ። ናብ ገዛና ብምምጽኣይ ዓቢ ሓጐስ ኰነ። ዋላ እኳ ሓወይን ብዙሓት ካልኦትን ነዚ ሰብ’ዚ ከምዚ ከመይ ኢሉ ይግበረሉ እንተበሉ ኣቦይ ግና ኣፍቂሩኒ፣ ታሪኸይ ኩሉ ለዊጥዎ። ኣነ ድማ ደጊም ካብ ቤት ኣቦይ ምውጻእ መዘዙ ዓቢ ምዃኑ ተረዲኤ ንዘኣለም ኣብ ቤት ኣቦይ ክነብር ወሰንኩ።  ኩቡራት ኣሕዋተይ እዚ ብሓውሲ ዛናታ ጌረ ዘቕረብኩልኩም ታሪኽ ካብ ሉቃስ 16 ብዛዕባ እቲ ጥፍኡ ወዲ ኢየሱስ ክርስቶስ ዝሃቦ ምስላ እዩ። ክርድእና ኢለ ድማ ብኸምዚ ከነንብቦ ዝጸናሕና ዛንታ ኣቕሪበዮ ኣለኹ። እዚ ኣብ ታሪኽ ዝረኣናዮ ጥፍኡ ወዲ ዝምህረና ዓቢ ቁም ነገር ኣሎ። ዘማራይ ዳዊት ክዝምር ከሎ “ካብ ሽሕ ዓመት ኣብ ቤት ረሲኣን ሓንቲ መዓልቲ ሓላዊ ቤትካ ምኳን ይሕሸኒ።” ይብል። እዚ መንእሰይ ግና ኣብ ቤት ኣቡእ ንምንባር ኣይፈተወን፣ ሎሚ ካብ ቤት ኣምላኽ፣ ካብ ሕቑፊ ኣምላኽ ከውጸኣና ዝደሊ ነገር ኣሎ ዶ፧  ዓለም እንትርፎ መርገም ከም ቤት ኣምላኽና በረኽትን ብጽእናን የብላን። ብዙሕ ግዜ ካብ ቤት ኣምላኽ ብሓንሳብ ኣይኰነን ሰይጣን ከውጻና ዝደሊ እንታይ ደኣ በበቑሩብ እናገበረ እዩ ካብ ኣምላኽ ከዝብለና ዝጋደል። ካብቲ ኣብ መስቀል ስለ ሓጢኣትና ዝተሰቅለ  ክርስቶስ ርሒቕና ዱንኳውንትና ኣብዛ ምድሪ ክንተክል እንተ ጀሚርና ሰይጣን ኣብ መጻወድያኡ ከእትወና ብጣዕሚ  ቐሊል እዩ። ስለዚ ሓለፋ ቤት ኣምላኽ ኣብዛ ምድሪ ፈጺሙ የሎን። ዘሎ እንተ መሲሉና ግና ተታሊልና ኣሎና። ከምቲ ኣሳፍ ካብ ቤት ኣምላኽ ወጺኡ ናብ ረሲኢነት ምስ ጠመተ እሞ ከም ዝዓሸወ ተረዲእዎ ምስ ተመልሰ ዝበሎ ንበል፣ “ንዓኻ ኣብ ሰማይ ካብ ረኽብኩ ኣብ ምድሪ ዝደልዮ የብለይን ከውሒ ርስተይን ዕጻይን ንዘልኣለም ንስኻ ኢኻ” ብዝተፈላላየ ድካምን ውድቀትን ካብቲ ፈቃር ኣምላኽ መድሓኒ  ኢየሱስ  ክርስቶስ ወጺእና ክንህሉ ንኽእል ኢና። ኣብዚ ከምዚ እዋን እዚ እቲ ማዕጾ ኣምላኽ ኩፉት እምበር ዕጽው ኣይኰነን። ከመይሲ “ዝወደቐስ ኣይትንስእንዶ ፧ ዝተጋገየኸ ኣይምለስንዶ፧ ” ተባሂሉ ተጻሒፉ ኣሎ።

ምሕረት ኣምላኽ ዘልኣለማዊ እዩ፣ ንኽንምለስ ምሉእ ዕድል ኣሎና። ሃዋርያ ጳሎውሎስ ናብ ሰብ ሮሜ ክጽሕፍ ከሎ “ብዛዕባ እስራኤል ግና፡ ናብ ዘይእዙዝን ተቓዋምን ህዝቢ ምሉእ መዓልቲ ኢደይ ዘርጋሕኩ፡ እዩ ዚብል።” ብምባል ኢድ ኣምላኽ ንምሕረት ኩሉ እዋን ዝርግሕቲ ምኻና ይዛረብ። ሰብ ነቲ ዝበደሎ ሰብ ሓንሳብን ንሓዋሩን ልቡ ክዓጽወሉ ይኽእል እዩ ኣምላኽ ግና ከም ሰብ ኣይኰነን ብምሕረት ምሉእ ብዓል ዓቢ ሳሕልን ምሕረትን  እዩ። ንሱ ከምዚ ጌርካ ወይ ከምዚ ወሲኽካ ኢሉ ኣይጸባጸብን እንታይ ድኣ ንምምላስካ ወትሩ ልቡ ምስ ከፈተልካ ኣእዳው ድማ ምስ ዘርገሐ እዩ።  እምበኣር ካብዚ ቤት ኣቡኡ ገዲፉ ናይ ሰይጣን ገዛ ዝሰርሓ እሞ ዝተጣዕሰ ፥ ተጣዒሱ’ውን ካብ ኣብኡ ምሕረት ዝለመነ ወዲ እንታይ ንመሃር?   እዚ ካብ ቤት ኣብኡ ዀብሊሉ ዝወጸ መንእሰይ ኣብ ውሽጢ ዓለማውነት ምስ ጠሓለ ብሓጥያት ድማ ምስ ተጨማለቐ ዝነበሮ ናይ ቤት ኣብኡ ህይወት ብምውድዳር ኣብ ከቢድ ጣዕሳ እዩ ኣትዩ። ጣዕሳ እቲ ፈለማ ጸራጊ መንገዲ እዩ። ካብ ቤት ኣምላኽ ወጺና ኣብ ሓጥያት ምጭምላቕና፣ ንፍቕሪ ኣምላኽ ዝባና ሂብና ምኻድና ኣብ ውሽጥና ክቱር ጣዕሳ ክፈጥር ኣለዎ። ብዙሕ እዋን ካብ ቤት ኣምላኽ ምውጻና ጣዕሳ ይስምዓና ይኸውን ግና እቲ ጹቡቕ ዘይኰነ ነገር ወትሩ ኣብ ጣዕሳ ክነብር ከሎና እዩ። ምጥዓሳና ሰናይን እቲ ፈላሚ መንገዲ ናይ ምምላስ እኳ እንተዀነ ኣብኡ ጥራይ ክነብር ግና ፍቓድ ኣምላኽ ኣይኰነን። ሰይጣን ንጣዕሳና ብሕልናዊ ወቐሳና ብዘይትቐባልነት ስለ ዝደፍኖ ወትሩ ኣብ  ጭንቀት ጥራይ እዩ ዘውድቐና። ክንዮ ጣዕሳ ክንከይድ ክንቃለስ  ኣሎና። ጣዕሳና ናብ ካልእ ውሳኔ ከሰጋግረና ኣለዎ። ንሱ ድማ ናብ ንስሓን ኣብ ትሕቲ ፈቃር ኣምላኽ ወዲቅካ ምሕረት ናብ  ምልማንን ኢዩ። ነዚ ንክንገብር ፥ ኣማላድነት ኣዴና ድንግል ማርያም ተራዳእነት ቅዱሳን ኣይፈለየና ።

ይትባረክ ኣምላከ ኣበዊነ.

ናይ ዘመን አቆጻጽራ ባሕረ ሓሳብ

ባሕረ ሐሳብ ካብ ክልተ ናይ ግእዝ ቃላት ዝተረከበ ኾይኑ ባሕር ዘመን  ሓሳብ  ካኣ ቁጽሪ ማለት አዩ:: ባሕረ ሓሳብ ዝደረሰ ቅዱስ ድሜጥሮስ ዝተባህለ  ናይ እስክንድርያ ሊቀ ጳጳስ ማለት ካብ ቅዱስ ማርቆስ መበል 12 ፓትርያርክ  ኮይኑ ዝተሾመ ካብ 180 ክሳብ 222 ዓ ም ን42 ዓመት ሊቀ ጳጳስ ዝነበረ ኣቦ እዩ።

ቅዱስ ድሜጥሮስ በዓላትን ኣጽዋማትን ካብ ጥንተ መዓልቶም ከይወጹ ከይናወጹ ይምነ ነበረ።እዚ ድማ

• ጾመ ነነዌ፣ጾመ አርብዓ፣ጾመ ሐዋርያት ካብ ሰኑይ
• በዓለ ርክበ ካህናት ።ጾመ ድኅነት ካብ ረቡዕ
• ባዓለ ዕርገት ካብ ሓሙስ
• በዓለ ደብረ ዘይት፣ሆሳዕና።ትንሳኤ፣ጰራቅሊጦስ ካብ ሰንበት ከይወጹ  ኣብ ዕለቶም ክውዕሉ ዝብል ቅዱስ ሓሳብ ነበሮ።

መልአኽ እግዚአብሔር ካኣ ነገር ብትምኒት ኣይከውንን እዩ ‘ሞ ብከምዚ ዝስዕብ ሱባዔ ኣቲኻ ርኸቦ በሎ።

• ካብ ለይቲ 23 ሱባዔ ኣቲኻ አበቅቴ።
• ካብ መዓልቲ 7 ሱባዔ ኣቲኻ መጥቅዕ ይኹንካ በሎ።
• 23 ሱባዔ ማለት
  1 ሱባዔ=7 መዓልታት
  23.7
  161 መዓልታት
  ኣዋጅ፣ዝኾነ ቁጽሪ ብ 30 ብ 30ይመቀል
  161/ 30=5 ተረፍ 11
  11 ጥንተ አበቅቴ ይበሃል።
• ሸውዓተ ሱባዔ ማለት፣
  1 ሱባዔ፡ 7 መዓልታት
  7.7=49
  ብ 30 ምስ እንመቕሎ 49/30=1 ተረፍ19
  19 ጥንተ መጥቅዕ ይበሃል።መጥቅዕን አበቅቴን ተደሚሮም ካብ 30 አይበዝሑን ካብ 30 አይውሕዱን እዮም።

እዞም አጽዋማትን በዓላትን ብኸመይ ተረኺቦም?

ብክልቲኦም ብርሃናት ፀሓይን ወርሕን አቆጻጽራ አዩ ማለት ብጸሓይ ዓመት 365 መዓልታትን 15 ኬክሮስን 6 ሰዓትን ብወርሒ ድማ ዓመት 354 መዓልታትን 22 ኬክሮስን እዩ። ኣብ መንጎኦም ናይ 11 መዓልታት ፍልልይ ኣሎ። እቲ ኣብ ዓዓመቱ ዘሎ ናይ 11 መዓልቲ ፍልልይ ንበዓላት መርከቢ ዝሕግዝ ብምኻኑ አበቅቴ ይበሃል።አበቅቴ ዝብል ቃል አፓክቴ ካብ ዝብል ናይ ግሪክ ቃል ዝተረከበ ኮይኑ ተርፍ ዓመት ማለት እዩ።አበቅቴ ኣብ 19 ዓመቱ ዝመላለስ ዐውዲ አለዎ።እዚ ድማ ዐውደ አበቅቴ ይበሃል።ምስ አበቅቴ ዝምድና ዘለዎ መጥቅዕ እዩ።ናይ ወርሒ ዓመት ኣብ ነሓሴ ወይ ኣብ ጳጉሜን ይጅምር እሞ ኣብ መስከርም ወይ ኣብ ጥቅምቲ መበል 30 መዓልታ እተኽብረላ መዓልቲ መጥቅዕ ይበሃል።መጥቅዕ ደውል ማለት ክኸውን እንከሎ ናይ አይሁድ ሓድሽ ዓመት የመልክት

እዋጅ

• መጥቅዕ ካብ መስከረም 15 ክሳብ ጥቅምቲ 13 ኣብ ዘለዉ ኣብ መንጎ 29 መዓልታት ይውዕል።
• መጥቅዕ ካብ መስከረም 15 ክሳብ መስከርም 30 ክውዕል አንከሎ ነነዌ ኣብ ጥሪ ይውዕል።
• ካብ 2 ጥቅምቲ ክሳብ 13 ጥቅምቲ ክውዕል እንከሎ ድማ ነነዌ ኣብ የካቲት ይውዕል።

ናይ ባሕረ ሓሳብ መበገሲ ዓመተ ዓለም መቁጸሪኡ ዓውደ ኣበቅቴ ስለዝኾነ ። መጀመርታ ናይ 2007ዓም ን ዓመተ ዓለም ንረክብ።

• ዓመተ ምሕረት +ዓመተ ኩነኔ= ዓመተ ዓለም
• 5500+2007= 7507 ይኸውን። እዚ ዓመተ ዓለም እዩ ዝበሃል። ዓመተ ዓለም ንጥንተ ኣበቅቴ መቒልና ተርፍ ንሕዝ
• 7505 /19=395 ተርፍ 2 ይኸውን

እዚ ማለት ዓለም ካብ ዝፍጠር ክሳብ 2007 ዓ.ም 395 ዐውደ አበቅቴ መሊኡስ ን396 ዓውድ መበል 2 ዓመት በጺሑ ማለት እዩ።2007 ተጀሚሩ እምበር ስለዘይተወድኣ ካብ መበል ክልተ ዓመት ሓደ ኣጉዲልና ሐደ ንረክብ። (2 -1=1) 1 ወንበር እዚ ድማ ወንበር ንብሎ። ኣብ ዝሐለፈ ሐደ ዓመት ክንደይ አበቅቴታት( ኣብ መንጎ ፀሓይን ወርሕን ዘሎ ናይ 11መዓልቲ ፍልልይ365-354=11 )ከም ዝሓለፉ የርእየና።

በዚ መሰረት ናይ 2007 አበቅቴ ንምርካብ 11.1= 11 ይኸውን። ስለዚ ናይ 2007 አበቅቴ 11 ረኺብና ማለት እዩ።

አበቅቴ ብሓጺር መንገዲ ምርካብ

አበቅቴ ብሓጺር መንገዲ ንምርካብ ናይ ዝሓለፈ ዓመት አበቅቴ ምስ እንፈልጦ ንዝቅጽል ዓመት አበቅቴ ንኽንፈልጦ ይቐለልና ማለትና እዩ ።

• ምኽንያቱ ኣብ መንጎ ፀሓይን ወርሒን ዘሎ ፍልልይ ዓሰርተ ሐደ አዩ ኢልና ኣለና።እዚ ዓሰርተ ሓደ ኣብ ዓዓመቱ ኣብቲ አበቅቴ ምስ እንድምሮ ናይ´ቲ ዘበን አበቅቴ ንረክብ ማለት እዩ።ብኻልእ ኣበሃህላ ኣብ መጀመርታ ዓመተ ዓለም አበቅቴ 11 ኔሩ ማለት እዩ ካልአይ ዓመት 22፣ኣብ ሳልሳይ ዓመት 33 /ን30 ምስ እንመቕሎ/ 3 ይተርፈብ ራብዓይ ዓመት /3+11=14 አብ ሓሙሻይ ዓመት/14+11=25 እዩ ስለዚ ናይ ዝሓለፈ ዓመት አበቅቴ እንተፈሊጥናዮ ናይ ሎሚ ዓመት ናይ ሎሚ ዓመት እንተፈሊጥናዮ ናይ ዚመጽእ ዓመት 11 ብምውሳኽ ንረኽቦ ማለት እዩ። ስለዚ ኣብ ዓመተ 2006 አብቅቴ ኣልቦ ስለዝነበረ ናይ ሎሚ ዓመት ኣበቅቴ 11 ይኸውን ማለት እዩ።

ዘመነ ብሉይን ዘመነ ሓዲስን ብጠቅላላ ዓመተ ዓለም ይበሃል።ንሱ ድማ 5500 ዓመተ ፍዳ ተደመሮ 2007ዓመተ ምህረት 7507 ዓመተ ዓለም ይኸውን። ስለዚ አዕዋዳት ዝበሃሉ ነዚ ዓመተ ዓለም ንሰፍረሉ ወይ ንልካዐሉ ድማ እዮም።
ንሳቶም ድማ 7 እዮም፣

1. ዓውደ ዕለት ፣ካብ ሰኑይ ክሳብ ሰንበት ዘለዉ መዓልታት ክኾኑ እንከለዉ ኣብ ሰሰሙን ተመላሊሶም ወይ አንዳዘሩ ዝመጹ እዮም። እዞም ሰሙናት እንዳተመላለሱ ወርሓት ይፈጥሩ።
2. ዓውደ ወርሒ፣ሓደ ወርሒ ዝበሃል ብፀሓይ ሙሉእ 2 ሰላሳ መዓልታት ክኸውኝ እንከሎ ብወርሒ ድማ 29 መዓልታት ሓደ ግዜ ካኣ 30 መዓልታት ይኸውን። እዚ ብ30 መዓልታት እንዳተመላለሰ ወርሒ ይፈጥር።
3. ዓውደ ዓመት ፣ብፀሓይ 365 መዓልታት 15 ኬክሮስ/ 12. 30=360 +5 ጳጉሜን ክኸውን እንከሎ ብወርሒ354 +22 ኬክሮስ 6 ወርሒ 29 መዓልታት +6 ወርሒ 30 መዓልታት ይኸውን/ 6.29=174,6.30=180ተደሚሩ354 መዓልታት ይኸውን።
4. ዓውደ አበቅቴ /ንዑስ ቀመር/፣አብ 19 ዓመታት ዘይሩ ዚመጽእ ኣዩ።አብዚ ግዜ እዚ ፀሐይን ወርሕን ዝራኸባሉ ግዜ እዩ። ፀሓይን ወርሕን ክልቲአን ረቡዕ መዓልቲ ብሓደ ኆኅት (መስኮት) ውሽጢ ዝተፈጥሩ ስለዝኾኑ ካብቲ ግዜ እቲ ጀሚሮም ዑደት ይገብሩ።አብ ላዕሊ ከም ዝረኣናዮ ኣብ ዓዓመቱ ፀሓይ ሙሉእ 365 መዓልታት ክትዘውር እንከላ ወርሒ ግን 354 መዓልታት ጥራይ ትዘውር ኣብ ሞንግኣን ዘሎ ፍልልይ 11 መዓልቲ ክኸውን እንከሎ እዚ ጥንተ አበቅቴ ይበሃል።ክልቲኦም ን18 ዓመታት ተፈላልዮም ድሕሪ ምጽናሕ ኣብ 19 ዓመት ሓደ ግዜ ኣብ ዝተፈጥራሉ ኆኅት መስኮት ይራኸባ።እዚ ድማ ዓውደ አበቅቴ ይበሃል።
5. ዓውደ ፀሓይ ፣ኣብ 28 ዓመት እንዳተመላለሰ ዚመጺእ እዩ። ምኽንያቱ ፀሐይ ዚተፈጠረትሉ ረቡዕ መዓልቲ እዩ። ኣብ 28 ዓመት መዓልቱን ወንጌላውን ይራኸቡ።መዓልቱ ፀሓይ ዝተፈጠረትሉ መዓልቲ ረቡዕ፣ወንጌላዊ ድማ ናይ መጀመርታ ቅዱስ ማቴዎስ ዝራኸብሉ እዩ።ሊቃውንቲ ቤተክርስቲያና ረቡዕ ማቴዎስ ይብልዎ።
6. ዓውደ ማኅተም ማእከላዊ ቀመር 76 ዓመት እዩ። ኣብ 76 ዓመት ሓደ ግዜ አበቅቴን ወንጌላውን ይራኸቡ።ማኅተም ማለት መፈጸምታ መደምደምታ ወይ መጨረሻ ማለት እዩ።ንምንታይ ማሕተም ተባህለ ንዚብል ናይ ኣበቅቴን ናይ ወንጌላውን በጨረሻ ዝረኸቡሉ ስለዝኾነ እዩ። ኣብ 76 ዓመት ሓደ ግዜ ናይ አበቅቴን መጨረሻ 18 ን ናይ ወንጌላዊ ዮውሓንስ መፈጸምታ ይራኸቡ። ጥንቱሰ ለቀመር ዕለት ሰሉስ ወወንጌላዊ ማቴዎስ ወፍጻሜሁ ዕለተ ሰሉስ ወወንጌላዊ ዮሓንስ ናይ ቀመር ወይ ቁጽሪ መጀመርታ ሰሉስ ናይ ወንጌላዊ መጀመርታ ማቴዎስ ክኸውን እንከሎ ናይ ቀመር መጨረሻ ሰኑይ ናይ ወንጌላዊ ፍጻሜ ዮሃንስ እዩ ከም ዚብል።አበቅቴ 18 ዝኸውን ኣኣብ 19 ዓመት ክኸውን እንከሎ 18 ምስ ኮነ ኣብ ዓመቱ ኣልቦ እዩ ዝኸውን። ወንጌላዊ ዮሃንስ ዝኾነሉ ዓመት ዝረኸበሉ ኣብ 76 ዓመት ሓደ ግዜ ጥራይ እዩ።ስለዚ እዩ ዓውደ ማሕተም 76 ዝኾነ።
7. ዓውደ ዐቢይ ቀመር ዐቢይ ቀመር፣532 ዓመት እዩ ኣብዚ ግዜ እዚ ሰለስተ ነገራት ብሓደ ይራኸቡ ንሳቶም ድማ፣መዓልቲን አበቅቴን ወንጌላዊን እዮም።መዓልቱ ሰኑይ አበቅቴን ወንጌላውን ካኣ ኣብ ላዕሊ ከም ዝረኣናዮ 18 ኣበቅቴን ወንጌላዊ ዮውሃንስ እዩ።

እዞም ሸውዓተ አዕዋዳት ዝተባህሉሉ ሓደ ግዜ ተፈጺሞም ወይ ተራእዮም ዝተርፉ ዘይኮኑስ ብኻልእ ግዜ ተመላሊሶም ዚመጽኡ ስለ ዝኾኑ እዮም።

ናይ ሓደ ዓውደ ኣበቅቴ ጉዕዞ

ዓ ም	ዓመተ አበቅቴ	አበቅቴ	መጥቅዕ	ልደተ አበቅቴ
2006	1ይ	ኣልቦ(0)	መስከረም 30	መባቻ(0)
2007	2ይ	11	መስከረም 19	ነሓሰ 25
2008	3ይ	22	ጥቅምቲ 8	ነሕሰ 14
2009	4ይ	3(33)	መስከረም 27	ጳጉሜን 3
2010	5ይ	14(44)	መስከረም 16	ነሓሰ 22
2011	6ይ	25(55)	ጥቅምቲ 5	ነሓሰ 11
2012	7ይ	6(66)	መስከረም 2	ነሓሰ 30
2013	8ይ	17(77)	ጥቅምቲ 13	ነሓሰ 19
2014	9ይ	28(88)	ጥቅምቲ 2	ነሓሰ 8
1015	10ይ	9(99)	መስከረም 21	ነሓሰ 27
2016	11ይ	20(110)	ጥቅምቲ 10	ነሓሰ 16
2017	12ይ	1(121)	መስከረም 29	ጳጉሜን 5
2018	13ይ	12(132)	መስከርም 18	ነሓሰ 24
2019	14ይ	23(143)	ጥቅምቲ 7	ነሓሰ 13
2020	15ይ	4(154)	መስከርም 26	ጳጉሜን 2
2021	16ይ	15(165)	መስከረም 15	ነሓሰ 21
2022	17ይ	26(176)	ጥቅምቲ 4	ነሓሰ 10
2023	18ይ	7(187)	መስከረም 23	ነሓሰ 29
2024	19ይ	18(198)	ጥቅምቲ 12	ነሓሰ 18

አበቅቴ ተረፍ ዘመን እዩ ክንብል ከለና እንታይ ማለትና እዩ ?

ኣቀዲምና ከምዝገለጽናዮ አበቅቴ ኣብ መንጎ ፀሓይን ወርሕን ናይ ጉዕዞ ፍልልይ ዝተረኸበ እዩ።አበቅቴ ተረፈ ዘመን እዩ ክንብል ከለና ወርሒ ጉዕዞኣ ፈጺማ ካብ ደው ዝበለትሉ መዓልቲ ጀሚሩ ፀሐይ ጉዕዞኣ ክሳብ እትፍጽም/ ጳጉሜን ሐሙሽተ/ ዘሎ መዓልትታት ተረፈ ዘመን ወይ አበቅቴ ይበሃል።እዚኦም መዓልታት ንዝቕጽል ዓመት አበቅቴ ይኾኑ። ንኣብነት ወርሒ ናይ 2003 ዓም ጉዕዘኣ ዝፈጸመትሉ 28 2003 ዓ.ም እዩ ስለዚ ካብ ነሐሰ ዕስራን ትሽዓተን መዓልቲ ጀሚሩ ክሳብ ጳጉሜን ዕለት ሓሙሽተ ዘለዉ መዓልታት ሸውዓተ እዮም። እዚ ሸውዓተ ተረፈ ዘመን ክኸውን እንከሎ ንዝቅጽል ዓመት ማለት 2004 ዓም አበቅቴ ይኸውን ማለት እዩ።

ካብዚ ቀጺልና  ዘመነ ሰላምን ራህዋን ኮይኑ ዝተባእሱ ዝዕረቕሉ ዝተኣስሩ ዝፍትሕሉ ዝጠመዩ ዝጸግብሉ ፍትሒን ሓቅን ዝነግሰሉ ዘመን ክኾነልና እናተመነና ናይ 2007 ዓም ግእዝ  ወይ 2014-2015 ፈረንጂ  ኣጽዋማትን በዓላትን ነስዕበልኩም:
በዓላትን አጽዋማትን

በዓላት ወይ አጽዋማት	ብ ግእዝ	ብጎርጎርዮስ	ዝውድኣሉ ዕለት
ባሕቲ መስከርም	መስከረም ፩	መስከረም 11
ጾመ ነብያት	ሕዳር ፩፭	ሕዳር 24	ታሕሳስ ፳፱ (ጥሪ 07)
ጾመ ነነዌ	ጥሪ ፳፭	ለካቲት 2	ጥሪ፪፯ ( የካቲት 04)
ዓቢይ ጾም	ለካቲት ፱	ለካቲት 16	ሚያዝያ ፬ (ሚያዝያ12)
ደብረ ዘይት	መጋቢት ፮	መጋቢት 15
ሆሳዕና	መጋቢት፳፯	ሚያዝያ 5
ስቕለት	ሚያዝያ ፪	ሚያዝያ 10
ትንሳኤ	ሚያዝያ ፬	ሚያዝያ12
ርክበ ካህናት	ሚያዝያ፪፰	ግንቦት 6
ዕርገት	ግንቦት፩፫	ግንቦት 21
በዓለ መንፈስ ቅዱስ	ግንቦት ፪፫	ግንቦት 31
ጾመ ሓዋርያት	ግንቦት፪፬	ሰነ 1	ሓምለ፭ (ሓምለ12 )
ጾመ ድሕነት	ግንቦት ፪፮	ሰነ 3
ጾመ ፍልሰታ	ነሓሰ፩	ነሓሰ 7	ነሓሰ ፩፮ (ነሓሰ 22 )

ስብሓት ለእግዚአብሔር
ወለወላዲቱ ድንግል
ወለመስቀሉ ክቡር።

{flike}

ክርስትያን ዘረባኡ ብጸጋ ዝመልአ ብጨው ዝተቋመመ ንሰማዕቱ ባህ ዘብልን ንበረኸት ዝኸውን አዩ ክኸውን ዝግብኦ።
እቲ ንሰማዕቱ ንበረኸት ዝኸውን ንምህናጽውን ዘድሊ ሠናይ ዘበለ ዘረባ ድአ ተዛረቡ እምበር ዘይጠቅም ዘረባስ ካብ
ኣፍኩም ኣይውጻእ ከምዝበለ (ኤፌ. 4:29)።
ክፉእ ወሬ ናይዚ ኣንጻር ኮይኑ ሽም ሰብ ዘጥፍእ፣ኣእምሮ ዘጨንቕ፣ ተባህለ ተገብረ  አንዳበልካ ዝውረ ኣብ ክርስቲያናት ክፍጸም ዘይግበኦ ነውሪ እዩ። ክፉእ ወሬ ዝተፈላለዩ ሳዕቤናት ዘስዕብ ሓደገኛ ስነ ምግባር እዩ። ገለ ካብኣቶም ንክፉእ ወሬ ዘተባብዑ ነገራት  ሒዝና ቀሪብና ኣሎና።

1.ተስፋ ዘቑርጽ ክፉእ ወሬ

ተስፋ ኣብ ልዕሊ እምነት ዝቖመ ናይ ፍቕሪ ዓንዲ እዩ። ብተስፋ ዘይትጽበዮ ዘመናትን ዘይትጓዓዞ መንገድን የሎን።ሰይጣን ብተስፋ ከምዝሰዓር ከረድእ ከሎ ነቢዩ ሚክያስ “ኣቲ ጸላኢተይ (ሰይጣን) እንተወደቕኩ ክትንስእ እየ፣ኣብ ጸልማት እንተተቐመጥኩ’ውን እግዚኣብሔር ብርሃነይ እዩ’ሞ ብኣይ ኣይትተሓጐሲ” ይብል (ሚክ 7:8)።ብኣንጻሩ ሰይጣን ንሰብ ዝስዕሮ ብቀቢጸ ተስፋ ምዃኑ ኣበው ክገልጹ ከለዉ ሰብ ኣብ ትሕተይ ከምዝወድቕ ዝተኣማመን ተስፋ ምቑራጽ ክጅምር ከሎ እየ ይብል ሰይጣን ይብሉ።

 ክፉእ ወሬ ዘይከውን ክኸውንዩ ዘይመጽእ ክመጽእ እዩ፣ዘይተባህለ ተባሂሉ፣ንዝተባህለ ኣጋኒንካ ብምውራይ ንሰባት ኣብ ጭንቀትን ተስፋ ምቑራጽን ምብጻሕ ማለት እዩ።ነዚ ትምህርቲ ዝኾነና ታሪኽ እስራኤላውያን እዩ። ኣብ ግብጺ ብመሪርን ኣስካሕካሕን መግዛእቲ ክግዝኡ ድሕሪ ምጽናሕ እግዚኣብሔር ብኢድ ነቢይ ሙሴ ገይሩ ኣውጽኦም ፣ካብ ግብጺ ዝወጹ ምድሪ ከንኣን ንምእታው እዩ ነይሩ፣ ስለ ናይ ከንኣን እንታይነት ብወሬ ስለ ዝፈልጥዎ ንምእታዋ ዓቢይ ህንጡይነት እዩ ነይርዎም።

ይኹን እምበር ስግኣት ናይ ጸላእቶም ስለ ዝነበሮም ነቢይ ሙሴ ሰልዮም ዝመጽኡ 12 ሰባት መሪጹ ሰደደ። እስራኤላውያን ጽብቕቲ እያ ፣ክንኣትዋ ኢና ፣ንጸላትና ብሓይሊ እቲ ካብ ግብጺ ዘውጽኣና ክንስዕሮም ኢና ክብልዎም እንዳተጸበዩ፣ ንኣእምሮ ኣዘንቢሉ ልቢ ደፊኑ ነብራኽ ወለል ዘብል ክፉእ ወሬ ኣውረዩሎም ፣ብጀካ ኢያሱን ካሌብን እቶም 10 ሰልዮም ዝመጹ ሓንቲ ቃል ኮይኖም እታ ምድሪ ጽብቕቲ ምዃና እንተኾነ ግና እቶም ጸላእቶም ሓያላት ምዃኖም ብጭራሽ ክኣትውዋ ከምዘይክእሉ ገይሮም ኣውረይሎም ነዚ ብምስምዖም ተስፋኦም ዝበነነ እስራኤላውያን “መራሕቲ መሪጽና ናብ ግብጺ ንመለስ”ናብ ዝብል ውሳኔ በጽሑ።ተመልከቱ እሞ እዚ ውሳኔ እዚ ካብ ልቦም ዝወሰንዎ’ዶ  ይመስለኩም !!!

ንፈርኦንን ሰራዊቱን ኣብ ባሕሪ ኣስጢምም ግብጺ እንተኣተውስ ግብጻውያን ተቐቢሎም ስቕ’ዶ ምበልዎም ፣ነዚ ኣብ ግምት ኣየእተውዎን ፣ስለምንታይ ፣ብሓቂ ኣብ ግብጺ ጽቡቕ ሕይወት ይመርሑ ስለ ዝነበሩ ድዮም ነዚ ውሳኔ እዚ ዝወሰኑ᎒ ኣይፋሉን እቲ ሓቂ ተስፉ ምቑራጽ ክሳብ ክንደይ ሓደኛ ምዃኑን፣ ንትወስዶ ስጉምቲ እኳ ክሳብ ዘይትፈልጥ ዝገብር ምዃኑ እዩ ዘገንዝበና (ዘሁ. 12:14) ነዚ ኩሉ ዘምጸኦ ኩፉእ ወረ እዩ።

ብዛዕባ  ጭንቂ፣ ክፉእ ኩነታት ጥራሕ ከውርዩ ሕሊናኦም ዘይስከፉ ብዙሓት እዮም። ተራእዩኒ ኣሕሊሙኒ እንዳበሉ ልቢ ምእመናን ዘደናግጹ’ውን ውሑዳት ኣይኮኑን። ክርስቲያን ግና ተስፋ ኣብ ዘይብሉ ተስፋ  ዝህብ ፣ሽሕ እኳ ክፉእ እንተተሰምዐ መዓልቲ ትወልዶ ስለ ዘይፍለጥ ኣጆኻ/ኺ ጽናዕ ተስፋ ግበር ዝብል እዩ። ሊቀ ነቢያት ሙሴ ነቶም ፈርኦንን ሰራዊቱን ኣርኪቦምና ኢሎም ዓለም ብገፉሓ ዝጸበበቶም እስራኤላውያን ኣይትፍርሁ ደው በሉ እቲ ምድሓን እግዚኣብሔር ሎሚ ርኣዩ ። ኢሉ ድኣ ኣጸናንዖም እምበር ምስኦም ኮይኑ ንተስፋኦም ኣየጸልመተሎምን  (ዘሁ. 14:13)።

ሓደ ሓቀኛ  ክርስቲያን ኣይኮነን’ዶ ሓቅነቱ ዘይተረጋገጸ ወሬ ንምውራይ ክህወኽስ ክፍጸም’ዩ ተባሂሉ ንዝተረጋገጸ እውን ኣፉ ዝሃቦ ንምውራይ ኣይህወኽን እዩ።”ንምዝራብ ደንጐይቲ ኩኑ” ከም ዝበለ (ያዕ 1:20) እግዚኣብሔር ንነቢዪ ሳሙኤል ብዛዕባ ኣብ ኤሊን ደቁን እስራኤላውያንን ዝወርድ መቕዘፍቲ ሕሹኽ ኢሉ ምስ ነገሮ ነቢዩ ሳሙኤል ንኤሊ ንኸውርየሉ ኣይተሃወኽን፣ ሽሕ እኳ ምፍጻሙ ዘይተርፎ እንተነበረ ንኤሊ ክሳብ ክንደይ ከምዘሰንብዶ ስለ ዝፈለጠ ስቕድኣ በለ “ሳሙኤል እቲ ራእይ ንኤሊ ከይነግሮ ፈርሐ”ከምዝበለ (1ይ ሳሙ 3:15 ) እንተኾነ ግና ኤሊ ኣገዲዱ ፣ክረገመካ እየ ስለ ዝበሎ ቀስ ኢሉ ተረጋጊኡ ሓደ ብሓደ ነገሮ። ክርስቲያን ናይዚ ባህርይ ክለብስ ይግበኦ። ምናልባት ክንገር ዝገበኦ’ውን እንተኾነ ኩነታት ናይቲ እትነግሮ ኣጽኒዕካ  ቀስ ኢልካ ተዳሊኻ ክኽውን ይግባእ። እምበኣር ክፉእ ወረ ክሳዕ ክንድዚ ሓደኛ ምዃኑ ተገንዚብና ክንጥንቀቕ ይግባእ።

ስብሓት ለእግዚኣብሔር
ወለወላዲቱ ድንግል
ወለመስቀሉ ክቡር ኣሜን!!!

ይቕጽል……….

ምንጪ መጺሔት ቤተልሔም  ሕታም  1998

{flike}

“እግዚኣብሔር ጎይታ ሰራዊት ከምዚ ይብል ኣሎ፦ እስከ ብልብኹም መንገድኹም  ሕሰቡ” (ሓጌ 1᎓5) ቃል እግዚኣብሔር ልብና ኣብ መንገድና ክንገብር ይእዝዘና። በየናይ መንገዲ ንጓዓዝ ከምዘለና ክንሓስብ ይግባእ። እቲ ክንጓዓዘሉ መሪጽናዮ ዘለና መንገዲ ናበይ ከምዘብጽሓና ፈሊና እንተዘይፈሊጥናዮ ጉዕዞና ንኸንቱ እዩ ዝኸውን። ኣብ ምድሪ ብዙሓት ዝተፈላለዩ መንገድታት ኣለዉ፤ እንተኾነ ግን ኩላቶም ናብቲ ዝሓሰብናዮ ቦታ የብጽሑና እዮም ማለት ኣይኮነን ። ስለዚ እቲ ቅኑዕ ዝኾነ መንገዲ መሪጽና ምጉዓዝን  መንገድና ብልቢ ምምርማርን   ፈጺሙ ኣገዳሲ እዩ። 

ሰባት ብምድራዊ መጓዓዝያ ማለት ብኣውቶቡስ᎓ ብመኪና᎓ ብባቡር ከምኡ እውን ኣብ ነፋሪት ተሰቂሎም ካብ ሓደ ቦታ ናብ ካልእ ቦታ ይጓዓዙ፤ ናበይን መኣስን ከምዝበጽሑ ድማ ብልክዕ ይፈልጡ እዮም። ካብኡ ሓሊፎም’ውን   ብዙሕ መንገድታት ይሕንጽጹን ፕላን የውጹን። እቲ ዝገርም ግን  መብዛሕትኦም ናይ ህይወት ጉዕዞኦም ናበይ ምኻኑ ኣይፈልጡን እዮም። እታ ተሰቒሎም ዝጎዓዙላ ግእዝቲ ነገር ንስግኦም ተሰኪማ ካብዚ ናብቲ ተመላልሶም  ናብቲ ዘለኣለማዊ ህይወት ዘውህብ መንገዲ፤ ናብቲ ሰማያዊ ዝኾነ ጉዕዞ ግን ከተብጽሖም ኣይትኽእልን  እያ።

እሞ’ኸ ድኣ ንስኻ’ኸ ናበይ ኢኻ ትጓዓዝ ዘለኻ᎒ ናብራኻ ከመይ ይመስል᎒ ንስኻ’ኸ ንመን ትመስል᎒ ነዚ ኹሉ ንኻልኢት’ውን ትኹን  ደው ኢልካ ዶ ብልብኻ መርሚርካዮ ትፈልጥ᎒! ትጓዓዘሉ ዘለኻ መንገዲ ፈሊኻ ዘይትፈልጦ እንተኾይንካ ሎሚ መርምሮ። ኣብ ግዜና  ብዙሓት ሰባት እቲ ቁኑዕ ዝኾነ መንገዲ ፈሊጥናዮ ኣለና እናበሉ ብዝተፈላለየ መንገድታት ይጓዓዙ ኣለዉ። ይኹን እምበር እታ ዝጓዓዙላ ዘለዉ መንገዲ ኣንፈታ ከምዝሰሓተት መርከብ ብብርቱዕ ማዕበል እንዳተጸፍዐት ዕንክሊል ክትብል ትርኣ። ኣብኡ ድማ ብዙሕ ዋይ ዋይታን ጫው ጫውን ኣሎ።

ልብኻ ኣብ መንገድኻ ግበሮ!

ጠባራይን መሻረውን ኣይትኹን። ትዕቢትን ቁጠዐን ንነፍስኻ ክቆጻጸሮ ንገዛእ ርእስኻ ኣሕሊፍካ ንሓጢኣት ኣይትሃቦ። ሃዋርያ ቅዱስ ጳውሎስ ብመንፈስ ወዱ ንዝኾነ ጢሞቴዎስ ኣብ ዝጸሓፈሉ  መልእኽቲ “ ኣብተን  ዳሕሮት መዓልትታት ግና ኽፉእ ግዜ  ከምዝመጽእ ፍለጥ። ሽዑ ሰባት ፈተውቲ ርእሶም: ፈተውቲ ገንዘብ: ተጀሃርቲ: ዕቡያት: ተጻረፍቲ: ንወለዶም ዘይእዘዙ: ዘየማስዉ: ሃይማኖት ዘይብሎም: ተቐየምቲ: ሓመይቲ: ገዛእ ርእሶም ገቲኦም ዘይክእሉ: ጨካናት: ሰናይ ዘይፈትዉ: ከዳዓት: ህዉኻት ኪኾኑ እዮም….…“2ይጢሞ. 3᎓1” እንዳበለ ድሕሪ ምግላጹ ንሱ ግና ካብኡ ክርሕቕ ከምዘለዎ የዘኻኽሮ። ክቡር ንባቢ ንስኻ ‘ውን  ካብቶም  ዝዘርዘሮም ኩሎም ናይ ጥፈኣት መንገድታት ረሓቕ። በዞም ኣብ ላዕሊ ተዘርዚሮም ዘለዉ ናይ ጥፈኣት መንገድታት ትጎዓዝ እንተሃሊኻ ንልቦናኻ ፈትሾ እሞ በቲ ቅኑዕ ዝኾነ ክርስትያናዊ መንገዲ ተጎዓዝ። ሃዋርያ ቅዱስ ጳውሎስ ነዚ ኹሉ ኢሉ ምስ ኣብቀዐ ኣብ ቁጽሪ 10 ድማ ከምዚ በሎ፦ “ንስኻ ግና ትምህርተይ: ኣነባብራይ: ዕላማይ: እምነተይ: ትዕግስተይ: ፍቕረይ: ጽንዓተይ: ስደተይ: መከራይ…. ኣጸቢቕካ ትፈልጥ ኢኻ። “በቲ ዝተመሃርካዮ ነገር ጽናዕ” እንዳበለ ነቲ ናቱ ክርስቲያናዊ መንገዲ ኣብነት ጌሩ ንኽጓዓዝ ክዛረቦ እንኮሎ ንዕዘብ። ሕጂ ድማ ነዓኻ ቃል ኣምላኽ ልብኻ ኣብ መንገድኻ ግበሮ ይብለካ ኣሎ።

ንመንገድኻ ብጥበብ መርምሮ!

ጥበበኛ ንጉስ ሰሎሞን “ወደየ ጥበብን ፍልጠትን ተጠንቂቕካ ሓዘን። ነዚአን ካባኻ ኣይትፍለየን። ንሳተን ሕይወት ክህባኻ እየን፤ ንኽሳድካ ኸኣ ስልማት ክኾናኻ እየን። ሽዑ ሃዲእካ መንገድኻ ኽትከይድ፥ እግርኻ እውን ኣይክትዕንቀፍን ኢኻ” (ምሳ. 3᎓21-23)። ብመልክዕ ኣምላኽ ዝተፈጠርካ ሰብ ስለ ዝኾንካ እግዚኣብሔር ኣምላኽ ነቲ ጽቡቕ ካብቲ ሕማቕ ፈሊኻ ትፈልጠሉ ኣእምሮ ሂቡካ ኣሎ።

ምስ እግዚኣብሔር ዘመሳስለካ እምበኣር እዚ ናይ ምስትውዓል ኣእምሮኻ እዩ። ምስ እግዚኣብሄር የመሳስለካ ክበሃል እንከሎ ግን ብኸመይ መገዲ እዩ᎒ ሃዋርያ ጳውሎስ “ኣነ ንኽርስቶስ ከምዝመስል ንስኻትኩም ድማ ነዓይ ምሰሉ” ኢዩ ዝበለ። ስለዚ ንእግዚኣብሔር መሲልካ ምፍጣር ወይ ድማ ውሉድ እግዚኣብሔር ምኳን ማለት በቲ እግዚኣብሔር ዝደልዮ መንገዲ ምኻድ ማለት እዩ። ኣታ ፈላጥ እየ በሃሊ  መንገድታትካ ግን ምስ መንገዲ እግዚኣብሔር ሓቢረን ዘይጓዓዛ እንተኾይነን  እቲ እግዚኣብሔር ዝሃበካ ምስሊ ኣጥፊእካዮ ኢኻ እሞ ንመንገድኻ ብጥበብ መርምሮ።

ጎይታናን መድሓኒና ኢየሱስ ክርስቶስ ኣብ ወንጌል ማቴዎስ ምዕርፍ ሓሙሽተ ጥቕልል ብዝበለ መንገዲ “ንዝጸልኡና ክንፈቱ፥ ንዝረግሙና ክንምርቕ፥ ስለቶም ዘሳጉጉናን ዝጸርፉናን ክንጽሊ፥ ንዘቐየሙና ይቕረ ክንብል ፈቃራት ክንከውን” ይምዕደናን የስተምህረናን። ኣብ (ገላ. 5᎓13) “ኣሕዋተየ ንስኻትኩም ሓራ ክትኮኑ ኢኹም ዝተጸዋዕኩም፤ እንተኾነ ንሓድሕድኩም ደኣ ብፍቕሪ ተገዝኡ እንበር እዚ ሓርነትኩምሲ ንምኽንያት ሓጢኣት ኣይትግበርዎ። ከመይ ሕጊ ብምሉኡ ኣብቲ “ንብጻይካ ከም ነፍስኻ ኣፍቅር” ዝብል ትእዛዝ ተጠቓሊሉ ኣሎ። ንሓድሕድኩም እንተተናኸስኩምን ተባላዕኩምን ግና ንሓድሕድኩም ከይትጣፍኡ ተጠንቀቑ”።

ስለዚ ንስኻ ድማ መንገድታትካ ኩሉ ብጥበብን ብምስትውዓልን ዝተመልአ ግበሮ። ኣብ መንፈሳዊ ጉዕዞኻ ሓጋዚ ክኾነካ ድማ ኣሰር እቶም ብቃል ኣምላኽን ብመንፈስ ኣምላኽን ዝተጓዕዙ ሓርበኛታት ኣቦታት ቤተ ክርስቲያን ሰዓብ፤ ቅዱሳት መጻሕፍቲ ኣንብብ፤ “ነቶም ቃል ኣምላኽ ዝነገርኹም መራሕትኹም ዘክርዎም መወዳእታ ንብረቶም እናተቛመትኩም ኣስር እምነቶም ሰዓቡ፤ ኢየሱስ ክርስቶስ ሎምን ትማልን ንዘለኣለም ንሱ እዩ። በብዓይነቱ ብዝኾነ ጋሻ ትምህርቲ ኣይትስሓቱ። በቲ ነቶም ዝሰዓብዎ ሓንቲ ዘይጠቐሞም ናይ መብልዕ ስርዓት ዘይኮነስ: ልብኹም ብጸጋ እንተጸንዐ ሰናይ እዩ” (ዕብ. 13᎓7-9)።መንገድኻ ካብ ዕብዳን: ስኽራን: ትዕቢት: ጭካነ: ሓሜት: ፍታው ገንዘብ: መን ከማይ ምባል: ጃህራ ዝኣመሰሉ ነገራት ዝረሓቐ ይኹን። ከምቲ ኣብ ገላትያ ተጻሒፉ ንረኽቦ ብመንፈስ እንተተመሪሕካ ትምኒት ሥጋ ኣይትፍጽምን ኢካ እሞ ምምልላስካ ብመንፈስን ብምስትውዓልን ይኹን (ገላ.5᎓16)።

እግዚኣብሔር መንገድና ክንምርምር ጥበቡ ይለኣኸልና።

ወስብሃት ለእግዚኣብሔር!!!

{flike}