ዕላማ᎓

 

ኣምላኽና ኣበይ ከምዘለናን ምሳና ክኸውን ከምዝደልን ምፍላጥ

 

መዘኻኸሪ ጥቕሲ᎓

”….. ሎሚ መዓልቲ ኣብ ገዛኻ ክውዕል ይግበኣኒ እዩ” ሉቃስ 19᎓5

 

መወከሲ᎓

 

ሉቃስ 19᎓1-10

 

መእተዊ᎓

ኣብ መደቀሲኹም ወላ ሓደ ሰብ ኣብ ዘይብሉ ንበይንኹም እንተትህልዉ እንታይ ትገብሩ ከም ዘለኹም መን ክሪኤኩም ዝኽእል ይመስለኩም? ኣምላኽ ኩሉ ግዜ ይርእየና እዩ። ንሱ ብዛዕባና ኹሉ እዩ ዝፈልጥ። ንሱ ማንም ዘይነገሮ ኾሎ ሽምና ይፈልጦ እዩ። ንሱ ቅድሚ ንሕና ምዝራብና እንታይ ከምዝሓሰብና ኣቐዲሙ ይፈልጥ እዩ።

 

ትምህርቲ᎓

 

ካብ ዕለታት ሓደ መዓልቲ ሓደ ዘኪዎስ ዝበሃል ሰበኣይ: ኢየሱስ ኣብቲ ንሱ ዘለዎ ከተማ ከም ዝመጸ ሰምዐ። ኮነ ድማ ኢየሱስ ኣብቲ ንሱ ዘለዎ ቦታ ከምዝመጸ ምስ ፈለጠ ንኢየሱስ ክሪኦ ብዙሕ ፈተነ። እንተኾነ ግን ክርእዮ ኣይከኣለን። ምኽንያቱ ዘኬዎስ ብቑመቱ ኣዚዩ ሓጺር ሰበኣይ ብምንባሩ ኣብ ጥቓ ኢየሱስ ብዙሕ ህዝቢ ተኣኪቦም ስለዝነበሩ ንኢየሱስ ንኸይርእዮ ከወልዎ። ሽዑ ሓደ ነገር ክገብር ሓሰበ። እንዳጎየየ ኸይዱ ኣብ ልዕሊ ሓንቲ ኦም ደየበ። ብኸምዚ ኢየሱስ ክሓልፍ ኮሎ ክርእዮ ከኣለ። ሽዑ ኢየሱስ ኣብታ ዘኬዎስ ተሰቒሉላ ዝነበረ ገረብ ምስ በጽሐ ደው በለ እሞ ንላዕሊ ገጹ ጠሚቱ ከምዚ በሎ፦ “ዘኬዎስ ውረድ ካብቲ ኦም ኣነ ሎሚ መዓልቲ ኣብ ገዛኻ ከኣቱ እየ”። ሽዑ ዘኬዎስ ብጣዕሚ ተሓጉሱ ቀልጡፉ ካብቲ ተሰቒልዎ ዝነበረ ኦም ወሪደ። ኢየሱስ ድማ ሽም ናይ ዘኬዎስ ሰብ ከይነገሮ ኮሎ ይፈልጦ ኔሩ። ዘኬዎስ ኢየሱስ ናብ ገዝኡ ምስ ወሰዶ ድማ ከምዚ በሎ፦ “ድሕሪ ሕጂ እቲ ቅኑዕ ዘበለ ነገር ጥራይ ክገብር እየ። እቲ ቅድሚ ሕጂ ዝወሰድክዎ ናይ ሰብ ገንዘብ ክመልሰሎም እየ። ፍርቁ ካብቲ ገንዘበይ ድማ ንድኻታት ክህቦም እየ”። ኢየሱስ ድማ ዘኬዎስ ከምኡ ስለ ዝበለ ኣዚዩ ተሓጎሰ። ብድሕሪኡ ዘኬዎ ንፉዕ ሰበኣይ ኮነ።

 

መደምደምታ᎓

 

ጎይታና ኢየሱስ ክርስቶስ ዘኬዎስ ንዑኡ ክሪእዮ ይደሊ ከምዝነበረ ኣጸቢቑ ይፈልጥ እዩ ኔሩ። ብኸሙኡ እዩ ድማ ካብቲ ደይብሉ ዝነበረ ኦም ውረድ ዝበሎ። ኢየሱስ ኩሉ እቲ ንደሊዮ ዘበለ ነገር ይፈልጥ እዩ። ከምኡ ድማ እቲ ንዓና ሰናይ ዝኾነ ነገር ይህበና። ኩሉ ኣብ ልብና ዘሎ ነገር ድማ ይፈልጦ እዩ።

 

ክብሪ ንኣምላኽና ይኹኖ ኣሜን።

 

ዕላማ᎓

 

እግዚኣብሔር ኣምላኽ ፈጣሪ ኩሉ ዓለም ምዃኑ ምፍላጥ

 

መዘኻኸሪ ጥቕሲ᎓

 

“እግዚኣብሔር ኣምላኽ ብመጀመርታ ሰማይን ምድርን ፈጠረ” (ዘፍ.1᎓1)

 

መወከሲ᎓ ዘፍጥረት 1

 

መእተዊ᎓

 

ሰላም እዞም ደቀይ ከመይ ቀኒኹም? እግዚኣብሔር ይመስገን እስከ በሉ። እወ እግዚኣብሔር ኣምላኽና ስለቲ ዝገብረልና ሰናይ ነገር ኩሉ ግዜ ከነመስግኖ ይግባእ። እበኣር ከስ ናይ ሎሚ ትምህርትና ከምዚ ይኸውን፦ እስኪ መን ኣሎ ዝነግረኒ ኣብ ደገ ምጽዋት ዝፈቱ? እንታይ ዓይነት ጸወታ ክትጻወቱ ትፈትዉ ኣብ ደገ? ኣግራብ፤ ዕንባባታት ከምኡውን ወሓዚ ማይ ምረኣይ ትፈትዉ ዶ? ቀላይ ወይ ድማ ባሕሪ ኣብ ዘለዎ ቦታ ኬድኩም ርኢኹም ዶ ትፈልጡ? ርኢኹም ዘይትፈልጡ ተኾንኩም ኣብ ዝቕጽል መዓልቲ ምስተራኸብና ስእሊ ናይ ባሕሪ ሒዘ ክመጽእ እንድየ ሽዑ ከርእየኩም እየ። ሓራይ ዶ?

 

ትምህርቲ᎓

 

እስኪ ሓንሳብ ኣዒንትኹም ሰም ኣብልዎ። ጸልማት ኮይኑ ምሽ!? ሕጂ ኸኣ እስከ የእዛንኩም ብኢድኩም ጌርኩም ሸፍንዎ። ኩሉ ሱቕ ኢሉ ምሽ?! ወልሓንቲ ኣይሰማዕኩምን። ቅድሚ ብዙሕ ዓመታት ቅድሚ ዓለም ምፍጣራ ኩሉ ነገር ሱቕ ኢሉ እዩ ኔሩ ወላ ሓደ ነገር ኣይስማዕን ነበረ። ከምኡ ድማ ጸልማት ነበረ። ወላ ሓደ ሰብ፤ ወላ ርግቢት ወላ ካልኦት እንስሳታት ኣይነበሩን። ሽዑ ኣምላኽ ተዛሪቡ “ ብርሃን ኩን በለ”…. ሽዑ ብርሃን ኮይኑ። ማዓልቲ ኾይኑ ጸሓይ በሪቓ። እቲ ብርሃን ድማ ጽቡቕ ከምዝኾነ ኣምላኽ ረኣየ። ሽዑ እግዚኣብሔር ኣምላኽ ነቲ ብርሃን ካብ ጸልማት ፈለዮ። ነቲ ብርሃን መዓልቲ ነቲ ጸልማት ምሸት ጌሩ ፈለዮ። ሽዑኡ ንወርሒ፤ ንኸዋኽብቲ ድማ ኣብ ጸልማት ከብረሃ ፈጢርወን። እዚ ኹሉ ድማ ጽቡቕ እዩ። ሽዑ ኣምላኽ መሊሱ ድማ ሰማይ ፤ ባሕሪ ይኹን በለ ከምኡ ድማ ኾነ። ግን ገና ምድሪ ጥራያን ኣብ ሱቕታን ነበረት። ሽዑ እግዚኣብሔር ኣምላኽ ኣእዋም፤ ኣታኽልቲ፤ ዝተፈላለዩ ክንበልዖም ንኽእል ፍሩታታትን የሕምልትን ከምኡ ድማ ንኸነሽትቶም ብዙሕ ዓይነት ዕንባባታት ፈጠረ። መሊሱ ድማ ኣብ ባሕሪ እንዳሓንበሱ ዝነብሩ ዓሳታትን ኣብ ሰማይ ዝነፍራ ኣዕዋፍን ገበረ። ኩሎም እንስሳታት ምስ ተፈጠሩ ሽዑ ጽምዋ ኣይነበረን። ከልቢ ውውውውው ድሙ ኛው ኛው ፤ ብዕራይ ድማ ሞእእ ሞእእእእ፤ በጊዕ ድማ እምበእእእእ ከም ኡውን ካልኦትን ክብሉ ምስ ጀመሩ ጽምዋ ዝበሃል ኣይነበረን። ኩሉ ድማ ጽቡቕ ነበረ ኣምላኽ ድማ በቲ ዝፈጠሮ ኩሉ ተሓጎሰ። ሓደ ነገር ግን ጎዲሉ… እንታይ ጎዲሉ ኣሎ? መን ኣሎ ዝነግረኒ? እወ ንፉዓት “ሰባት” ኢልኩም ምሽ? መልስኩማ። ሰብ ገና ኣይተፈጥረን ነበረ እሞ ሽዑ ኣምላኽ ንሰብ፤ ሰበኣይን ሰበይትን ጌሩ ፈጠሮም። እቲ ሰበኣይ ኣዳም ይበሃል፤ እታ ሰበይቲ ድማ ሄዋን ትበሃል ነበረት። ኣዳምን ሄዋንን ድማ ነንሕድሕዶም ይፋቐሩ ንበሩ ። ኣምላኽ ድማ ነዓዓቶም የፍቅሮም ብኹሉ ነገር ይሕግዞምን ዝደለይዎ ዘበለ ኩሉ ነገር ድማ ይገብረሎም ነበረ። ምሽ ደስ ክብለካ!?

 

ተረዲኡኩም ዶ ኩሉኹም? ዘይተረደኦ ተሊዩ ኢዱ ዊጥ የብል። ናይ በሓቂ ኩሉኹም ተረዲኢኩም? በሉ ሕቶ ከሓተኩም እየ። ኣብ መጨረሽታ መዓልቲ ዝተፈጥረ መን እዩ? ኣምላኽ ንኣዳምን ንሄዋንን የፍቅሮም ይሕግዞም ዶ ኔሩ?

 

መደምደምታ᎓

 

ኣምላኽ ንኹሉ ፈጡሩ። ነዓና ንሰባት ድማ ፈጢሩና። ነዚ ኹሉ ድማ ዝገበረ ኣምላኽ ሓደ ምኽንያት ስለ ዝነበሮ እዩ። ንሱ ነዓና ኣዚዩ ስለ ዘፍቅረና እዩ። ንሱ ኩሉ ጽቡቕ ነገር ክህልወና ይደሊ። ንሰማይ፤ እተን ጽቡቓት ኣዕዋፍ ክበራ ከለዋ፤ ሳዕርታት፤ ዕንባባታት፤ ኣእዋማትን፤ ኣዝማድና መሓዙትናን ካልኦትን ነገራት ክንሪኢ ኮለና ግዴታ ነዚ ኹሉ ዝገበሮ ኣምላኽ ምኳኑ ክንዝክር ይግበኣና። ኣብ ዝኾነ ቦታን ኣብ ዝኾነ ሰዓትን ንኣምላኽ ክንዝክሮን ከነመስግኖን ይግበኣና።

 

በሉ እዞም ደቀይ ኣምላኽ ይባርኩም ኣብ ዝቕጽል ኣርእስቲ የራኽበና ኣሜን።

 

ክብሪ ንእግዚኣብሔር ኣምላኽና ይኹን ኣሜን።

ዕላማ :

ብዛዕባ ትርጉም ሃዋርያነት ምፍላጥ

መዘኻኸሪ ጥቕሲ:

ነንሕድሕድኩም እንተተፋቐርኩም በዚ ደቂ መዝሙረይ ምዃንኩም ኩሎም ክፈልጡ እዮም”  ዮው  13:35

መወከሲ:

ማቴ.10

መእተዊ:

ኣዕርኽቲ ዘለውዎ መን  ኣሎ፧ ክንደይ ኣዕርኽቲ ኣለውኻ/ኺ፧ ነፍሲ ወከፍ ቆልዓ ኣስማት ኣዕርኽቶም/ተን ይንገሩ። ናይቶም ዓስርተ ኽልተ ሃዋርያት ስእሊ ቀሪብካ ንኽቖጽርዎም ኣቕርበሎም። ነፍሲ ወከፍ ስእሊ ነየናይ ሃዋርያ ከምዝውክል ሕተቶም።

ትምህርቲ:

ኢየሱስ ክርስቶስ ብዛዕባ ኣምላኽ ክምህር ክጅምር እንከሎ ነቲ ስራሕ ክሕግዝዎ ዝኽእሉ ፍሉያት ኣዕርኽቲ ደለየ ወይ ድማ ሓረየ። ከምቲ ንኩሉ ሰብ ዓርኪ ዘድልዮ ንኢየሱስ ካኣ ኣዕርኽቲ ኣድለይዎ። እቶም ኣዕርኽቱ ድማ ኣብ ኩሉ ዓለም ምስኡ እንዳወሰደ እቲ ንሱ ዝገብሮ ዝነበረ ይምህሮም ነበረ። ንኢየሱስ ዓሰርተ ክልተ ኣዕሩኽ  ነበርዎ ንሳቶም ድማ ሃዋርያት ተባሂሎም ይጽውዑ።
ሓደ ማዓልቲ ኢየሱስ ኣብ ጥቓ ባሕሪ ደው ኢሉ ክልተ ገፈፍቲ ዓሳ መርበቦም እንዳጽረዩ ከለዉ ረኣዮም። ንጴጥሮስን እንድሪያስን ጸዊዑ ድማ ንዑ ሰዓቡኒ በሎም። ሽዑ ጃልባኦም ምስ መርበቡ ኩሉ ገዲፎም ምስኡ ኸዱ። እንተላይ ያዕቆብ: ዮሃንስ( እቶም ቆሉዑ ነቲ ኣስማት ደድሕሬኻ ከምዝደግሙ ግበሮም )። ኢየሱስ ድማ ማቴዎስ ዝበሃል ሰብ ገንዘብ ክእክብ እንከሎ ረኣዮ። ኢየሱስ ድማ ምስኡ ድራር ክበልዕ ኣብ ገዝኡ ምስኡ ከደ። ማቴዎስ ድማ ኩሉ ዝነበሮ ገንዘቡ ገዲፉ ንኢየሱስ ሰዓቦ። ስለዚ ኢየሱስ ክንደይ የዕሩኽ ጌሩ ኣሎ? ክሳብ ሕጂ 5 ኮይኖም። ጴጥሮስ: እንድሪያስ: ዮሃንስ: ያዕቆብ: ማቴዎስ። ዓሰርተ ኽልተ  ክሳብ ዝኾኑሉ ድማ ካልኦት የዕሩኽ ድማ መረጸ። ኢየሱስ መታን ንዑኡ ክስዕብዎ: ካብኡ ክመሃሩ: ቃል ኣምላኽ ንኹሎም ሕዝቢ እንዳመሃሩ ክሕግዝዎ  እዩ መሪጽዎም።
 ኣዕርኽቲ ኢየሱስ እንታይ ይበሃሉ ?ወይ ድማ እንታይ ኢሉ ጸዊዕዎም?(ሃዋርያት), ካብኣቶም ንገሊኣቶም ኣስማቶም ንዝክሮም ዶ?

መዛዘሚ:

ጎይታና ኢየሱስ ክርስቶስ ንኹልና ነቶም እነፍቅሮ ኣዕርኽተይ ሃዋርያት ኢሉ እዩ ዝጽውዓና። ንሱ ድማ ኢሉ፦ ” ነንሕድሕድኩም እንተደኣ ትፋቕሩ ኾይንኩም በዚ ኩሎም ናተይ ደቂ መዝሙር ወይ ድማ ሃዋሪያት ምኳንኩም ክፈልጡ ኢዮም”። ከምቶም 12 ክልተ ሃዋርያት ንሕና ድማ ኩሉ ግዜ ንኢየሱስ ክንስዕቦ ይግበኣና። (ኩሉ ግዜ ከምቲ ኣብ መጽሓፍ ቅዱስ ግበርዎ ኢሉ ተጻሒፉ ከምዘሎ)። ንፉዓት ናይ ኢየሱስ ኣዕርኽቲ ክንከውን ( ኩሉ ግዜ ጸሎት ክንጽልን፤ ምስኡ ክንዘራረብን)ይግበኣና። ንዑኡ ክንእዘዞ: ካብኡ ክንመሃር: እቲ ክንገብሮ ዝግበኣና ዘበለ ኩሉ ክንገብር፤ ልዕሊ ኹሉ ነቶም ምሳና ዘለዉ ከነፍቅሮም ነንሕድሕድና ክንፋቐርን እዚ እቲ ዝዓበየ ነገር ኢየሱስ ክንገብሮ ካባና ዝደልዮ ነገር እዩ። በዚ መንገዲ’ዚ ኢና  ኣዕርኽቲ ኢየሱስ ክንከውን እንኽእል።

ስእሊ ናይ ሃዋሪያት ኣርእዮም። ካብ መጽሓፍ ቅዱስ እንዳኣርኣኻ ኣስማቶም ምሳኻ ኮይኖም እንዳጸውዑ ይቑጸርዎም።